Ittoqqortoormiini umiatsialivissaqanngivissorneq

Innuttaasunik saaffineqallattaaginnavippunga umiatsialivissaaleqineq erloqissutaaruttormat maani Ittoqqortoormiini.

Taamaattumik piaartumik ukioq manna umiatsianut inissaliorneq pisariaqaraluarpoq.

Siornaalli ukioq 2019 umiatsiat qaqitsivissarupput Kommunep kran-nia umiatsilivimmi ajortinnikuummat, umiatsialivissatut puttasoqaranilu tulluutinngimmat maani Ittoqqortoormiini. Taamanikkumiilli umiatsiat toqqisisimanartumik inissaqartinneqanngillat.

Umiatsialivimmik puttasumik ujaqqanillu ungalusamik sanasoqarnissaa siunniussaanikuuvoq. Taannamita qanoq ingerlava?

Ullumi ulloq 30-06-2021

Afdelingsleder/Kommuneingeniør Kristian Hammeken taavalu Entreprenør Avgo Barselajsen naapillugit isumasioqatigaakka taakkulu siunnersuutigigaluarpaat innersuullugulu, kommune nutaamik umiatsianut kran-itaassasoq. Taannalu peqquteqarpoq, Ittoqqortoormiini sikorsuaqartarnera piffissaq sivisusarmat taamatullu puttasuliorneq aamma umiatsianut suli isumannarpallaassalluni.

Taamaattumik Kran-itaarnissaq akikinnerullunilu pitsaanerpaassagaluarpoq.

Pingaaruteqarluinnarpoq politikkikkut piaarnerpaamik aalajangiiffigineqarnissaa. Taamattullu umiarsuaqartarnera akuttummat sukkanerpaamik suliaq suliarineqartariaqarpoq. (Kommuneingeniør Kristian Hammekennip allagai ilanngullugit nassiuppakka misissukkallu kranit qanoq akeqarnerini, taavalu assit takussutissat ulloq 29-06-2021 silarlulernerani ilungersunartumik umiatsinik qimagussuinermit)

Asasara kommunalbestyrelsimi ilaasortaq, Ken Madsen, (N).

Siullermik apeqqutigisannut qujanarujussuaq.

Ulloq 30. juunip 2021 allaffeqarfimmut apeqquteqaammik “Ittoqqortoormiini umiatsialivissaqanngivissorneq” pillugu allaffeqarfimmut nassiussivutit.

Politikkikkut akuerineqartoq ”Sinerissap qanittuani aalisarneq – umiatsiaararsorluni aalisarnermi atortut tunngaviusut pillugit immikkoortumut pilersaarut” atuarlugu Ittoqqortoormiini imarsiornermut tunngasut pillugit tulliuttuni suliniutit uku taaneqarput:

1. Immmikkoortoq 40B2-mi krani nutaaq.
2. Umiatsianik iluarsaasarfik nutaaq.
3. Qinngaaivata qinnguani nunniorneq, immikkoortoq 40B2.
4. Immikkoortoq 40B1-imi nunniukkap iluarsaannera

Immikkoortumut pilersaarummi 2021-mi krani ikkunneqassasoq allassimavoq, pilersaarutit allat ukiunut tulliuttunut inissinneqarput.

Ingerlatsivimmit inissiiffissaq pitsaanerpaaq suli misissorneqarpoq, naleqquttumik inissisimasumik nunniugaq qaffannertalik puttasumillu ikaartarfilik, mallinut sikunullu illersorneqartunik.

Inussiarnersumik inuulluaqqusillunga

Alex Nørskov
Sanarfinermut Avatangiisinullu Ingerlatsivimmi pisortaagallartoq