Inuussutissarsiutit tunngavigalugu atuaqatigiit Erhvervsklassen suliat sumut killippat

“Siusinnerusukkut qulequtaq tunngavigalugu kommunalbestyrelsemut siunnersuuteqarama 31/05 – 2022 oqaluuserineqarmat siunnersuutiga https://web.firstagenda.com/committees/207466/agendas/2554930/items/24006493
/documents/56989470  amerlanerussuteqartunik itigartinneqarpoq.

Aana aalajangiinermi oqaaseqaat:

Kommunalbestyrelsip aalajangernera:

Siunnersuut amerlanerussuteqartunit itigartitsissutigineqarpoq (IA aamma N), suliaq aallartinneqareermat.

Siunnersuut ikinnerussuteqartunit akuersissutigineqarpoq (S aamma D), ikinnerussuteqartunillu siunnersuut ataatsimiititamut susassaqartumut ingerlateqqinneqarnissaa kissaatigineqarpoq.

Ingerlatsivimminngaanniit tunngavilersuutigineqartut ilagaat Amerlanerussuteqartut anguniagarigaat (2021, IA & N) suliffeqarfiit atuarfiillu qanimut suleqatigiilernissaat.

Taamaattumik paaserusuppara suliffeqarfiit sorliit qanoq suleqatiginissaanut isumaqatigiissuteqarpugut (peqarpallu akissummut ilaatikkusuppara)

 Suliaq Inuussutissarsiutit tunngavigalugu atuaqatigiit (Erhvervsklassen) qanoq ilusilik pilersinneqarniarpa?

Piaartumik iliuuseqarnissaq pingaaruteqarpoq, tassami inuusuttuaqqat 16 – 18-nik ukiullit 30% angullugu Naatsorsueqqissaartarfiup nalunaarsorsimavai. Tamanna ernumanartutut isigaara inuusuttuaqqat atuarfik qimakkaangamikku taamak amerlatigisut susaqaratik inissittarnerat.

Atuartut atuagarsornikkut piginnaasakinnerusut kisiannili assassornikkut timermik atuinikkut piginnaasaqarnerusut (kropslig/kinæstestik intellinens ”håndværkmæssig”) taakkua piginnaasaasa atorluarnissaanut atuarfimmi periarfissiineq annikippallaarnera peqqutaalluni ”katataasartutut” taaneqarsinnaammata pingaartutut isigaara atuarfik qimatsinnagu pitsaasumik piginnaasatik malillugit aqqutissiuunneqarnissaat.

Naggataagut uggornarpoq qinigaaffik 2021 – 2025 naalermat suli timitalimmik pilersitsisoqarani.”

Asasara Peter Davidsen

Meeqqanut Atuarfeqarnermullu Ingerlatsivimmit Inuussutissarsiutit tunngavigalugu atuaqatigiit Erhvervsklassen suliat sumut killinnerat pillugu Kommunalbestyrelsimit apeqquteqaatigineqartoq qujassutigineqarpoq.

Kommunalbestyrelsip 2024-mi akuersissutigaa, meeqqat atuarfiat pillugu inatsimmi § 28 naapertorlugu misiligummik klassiliortoqarsinnaanersoq pillugu qinnuteqaammik suliaqartoqassasoq. Taamanikkumiilli suliniummik nassuiaat aammalu immikkut ittumik akuerineqarnissamik qinnuteqaat suliaralugit ingerlateqqinneqarput. Immikkut ittumik akuersissuteqarfigineqarnissamik qinnuteqaatissatut siunnersuut januaarimi 2025-imi naammassineqarpoq aammalu Ilinniartitaanermut Naalakkersuisoqarfimmut nassiunnissaa sioqqullugu pitsaassusia misissorneqarluni.

Qinnuteqaat akuersissutigineqassappat, alloriarneq tullinnguuttoq tassaassaaq, atuarfiit sorliit misiligummik ingerlatsiffiussanersut, aammalu suliniut ersarilluartunik nassuiaatilersorneqassaaq, tassanilu aamma allassimassalluni atuutilersinneqarnissaanut pilersaarut aammalu suliniummut tapersiissutigalugu suleqatigiissitat suleqatigalugit nalilersuineq. Ilinniartitaanermut Naalakkersuisoqarfik, Ilinniartitaanermut Aqutsisoqarfik aamma allat attuumassuteqartumik suliallit suliniummut tapersiinissamik soqutiginnillutik malinnaajumapput, aqutsisoqatigiinni suleqatigiissitamilu peqataasut ilaattut.

Suliniut iluatsilluassappat nukittuunik suleqateqarnissaq apeqqutaassaaq soorlu Ilinniartitaanermut Aqutsisoqarfik, brancheskolit, inuussutissarsiuteqartut, meeqqat atuarfii aammalu Ilinniartitaanermut aqqutissiuussisut suleqatigalugit.

Ataani apeqqutigineqartut akissutillu allanneqarput.

Suliffeqarfinnik suleqatigiinnissamik isumaqatigiissusiortoqarpa, taamaassappat kikkut?

Suliffeqarfiit immikkut isumaqatigiissusiorfigineqanngillat, kisianni tamanna suliap ingerlateqqinnerani misissorneqarumaarpoq. Alloriarneq siulleq tassaassaaq Sulisitsisut, CSR Greenlandip, maani peqatigiiffiit aammalu inuussutissarsiuteqartut attuumassuteqartunik suliallit oqaloqatigineqarnissaat.

Kisianni ingerlatsivik CSR Greenlandimik suleqatigiinnissamik isumaqatigiissuteqareerpoq, taassuma peqatigiiffiit aqutarai aammalu meeqqat atuarfiini praktikkerfissat ukiumoortumik pilersaarusiortarlugit. Isumaqatigiissut taanna erhvervspraktikkernermut tunngasuunngilaq, kisiannili annikitsunik ingerlataqarnissanik imaqarpoq, atuartut suliatigut misilittagaannik aammalu inuussutissarsiornermi piginnaasaannik annertusaasussanik imaqarlutik.

Suliaq Inuussutissarsiutit tunngavigalugu atuaqatigiit Erhvervsklassen qanoq ilusilik pilersinneqarniarpa?

Oktobari 2022-miit novembari 2023-p tungaanut inuussutissarsiutit tunngavigalugu atuaqatigiit periaaseq qanoq ittoq atorlugu ingerlassasut, inatsisitigut tunngaviit, suleqatigisat, sullitassat, sumiiffissat, sulisutigut pisariaqartitat, suliatigut imarisassaat, aaqqissuussaaneq aningaasaqarnermullu tunngasut pillugit ingerlatsivimmit misissueqqaarneq ingerlanneqarpoq. Misissueqqaarnerup inernera nassuiaateqarnikkut saqqummiunneqarpoq, taannalu Kommunalbestyrelsimit ulloq 12. marsi 2024 suliarineqarpoq.

Ingerlatsivimmiit innersuussutigineqarpoq periaaseq EUD10 Danmarkimit isumassarsiarineqartoq, tassani atuartut fagini assigiinngitsuni ataatsimoortuni killilikkanik atuartinneqartassapput inuussutissarsiutit tunngavigalugu atualernissamut akuerineqarnissamut piginnaasanik qaffassaanerup ilaattut. Tamatuma kingunerisaanik fagini naleqquttuni annertusisamik atuartitsisoqalersinnaaneranik neqerooruteqartoqarsinnaalissaaq aammalu inuussutissarsiutit tunngavigalugu ilinnialernissamut aammalu suliffeqarfinni praktikkernermik ingerlatsinissamut aqqutissarsiuussisoqalerluni.

Periuserineqartoq taanna sulianut tunngasoq atorneqassappat meeqqat atuarfiat pillugu inatsimmit immikkut ittumik akuersissuteqartoqartariaqarpoq atuartitsinermi patajaatsumik ingerlatsisoqarnissaa qulakkeerniarlugu.

Misiligummik ingerlatsineq atuarfinni misiliguteqarfiusuni marlunni ingerlanneqarnissaa naatsorsuutigineqarpoq ikinnerpaamik ukiuni atuarfiusuni tallimani. Atuarfiit sorliit ingerlatsiffiussanersut nangittumik aammalu atuarfiit allat atuartunik inuussutissarsiut tunngavigalugu atuaqatigiinni atuarusuttunik innersuussisassanersut paasiniarluaqqaarneqassaaq.

Inuussutissarsiut tunngavigalugu atuaqatigiinni sullitassat kikkuussappat?

Sullinneqartussat tassaapput 9. – 10. klassini atuartut, ilikkagaqarnissaminnut assassornermik perorsaanermillu annertusisamik pisariaqartitsisut. Pingaartumik pineqartut tassaapput atuartut assassornermik pikkoriffeqarluartut, inuussutissarsiornermi ilinniakkamik naammassisaqarsinnaasut, kisianni soorlu assersuutigalugu suliatigut kivinneqarnissamik amigaateqartut imaluunniit ukkassinissamik aammalu kajumissuseqarluarnermillu unammilligassaqartut. Inuussutissarsiut tunngavigalugu atuaqatigiit ilikkagaqarnissamut isumalinnik pilersitsissapput, taamaalillutik atuartut kajumissusiat aammalu inuussutissarsiutinut ilinniarfimmi atualernissamut akueritinnissamut namminneq periarfissaminnik pitsanngorsaaniassammata.

Nalilersueriaatsit suut atorneqassappat?

Ilaatigut inatsisitigut allannguisoqassanersoq misiliummik nalilersuisoqarnissaa anguniarneqarpoq, meeqqat atuarfianni inuussutissarsiut tunngavigalugu atuaqatigiinnik ataavartussamik aaqqiissuteqartoqarnissaanik periarfissaqarfiulersussamik.

Nalilersuinermi periaatsimik aalajangersimasumik suli suliaqartoqarnikuunngilaq, kisianni paasissutissanik amerlassusilerneqarsinnaasunik aamma paasissutissanik pitsaassusilerneqarsinnaasunik imaqassaaq.

• Atuartut suliatigut ineriartornerat
• Iluarisimaarinninnermut uuttuinerit
• Atuanngitsoortarnerit kajumissuseqarnerlu
• Inuussutissarsiuteqartunik aamma inuussutissarsiornermik ilinniarfinnik suleqateqarneq
• Qassit inuussutissarsiornermik ilinniarfinnut ingerlaqqittarnersut
• Il. il.

Ataavartumik nalilersuisoqartassaaq – kvartalikkuutaartuusinnaavoq imaluunniit ukiup affakkaartuulluni – aammalu ataatsimoortumik nalilersuinermi nalunaarusiamik naggaserneqartassalluni.

Naggataagullu atuarfiit sorliit maannamut suleqatigineqarpat?

Misiligut atuarfinni 1 – 2-ni ingerlanneqartussatut naatsorsuutigineqarpoq, kisianni atuarfiit sorliit ilumut peqataassanersut suli aalajangerneqanngilaq. Tamanna suliap ingerlateqqinneqarnerani aalajangiiffigineqarumaarpoq.

Inuussutissarsiorneq tunngavigalugu atuaqatigiit pillugit sulinerup nanginneqarnissaa ingerlatsivimmit qilanaarineqarpoq aammalu suliniut qanoq ingerlanersoq pillugu Kommunalbestyrelse ilisimatittassallugu.

Inussiarnersumik inuulluaqqusillunga:

Lone Nukaaraq Møller

Meeqqanut Atuarfeqarnermullu Ingerlatsivimmi pisortaq