Fritidsklub Kuummiit

Kuummiuni fritidsklub aserfallassimanera annertuumik takussutissaqarpoq. Pequtit atorsinnaajunnaarnikut piupput. 1985-mili sofa piusut suli atorneqarput. Sorpassuit aseruatitersimapput. Imermut attaveqanngillat, kiassaatillu ilaannai atorsinnaapput. Iikkat assut kusanaapput. Sulisut oqaluttuarnerat malillugit pinaveersaartitsinermut takussutissiat plakat-it Tasiilamiit tikittoqarneratigut piiaqquneqarsimapput. Iserfigisaq assut takussunarpoq, anngunneqartarsimagaluit utertiffigineqartarsimanngillat. 

Arlaatigut meeqqanik pisoqartillugu sulisut namminneq mobilitik atorlugit angajoqqaanut attaveqartarsimapput. Sulisut Kommunep ataani inunnut sullissisuullutik E-mail-qartinneqanngillat.  

1. Aseruatitersimasut taarsersornissaanut aningaasanik immikkoortitanik tigoriaannaqarpa? Konto sorleq?
2. Imermut attavilersinniarnermi aporfeqarsimappat, qanoq aaqqiisoqarnissaanik Kommune periusissiamik peqarpa?
3. Kiassaatit affaasa missaannai atorsinnaapput, taakku qaqugu aaqqinneqarsinnaanerat naatsorsuutigineqarsinnaava?
4. Pequtit nutaanngitsorujussuit qaqugu taarsersorneqarlutik nutarterneqarsinnaanerannik qanoq iliornikkut aaqqiisoqarsinnaava?
5. Fritidsklub immikkut mobilimik peqartariaqannginnerpa?
6. Sulisut pisunik pingaarutilinnik peqquteqarlutik saaffiginninnissamut tunngatillugu immikkut Kommuneqarfik Sermersooq ataani maileqartinneqassanngillat?

Asasara Kommunalbestyrelsimi ilaasortaq, Laura Táunâjik Uitsatikitseq (S)

Ulloq 25. oktobari 2024 “Fritidsklub Kuummiit” pillugu allaffeqarfitsinnut apeqquteqaateqarputit. Apeqqutitit Tunumi Nunap immikkoortuani chefimut ingerlateqqinneqarput, imalu akissuteqarpoq.

Siullermik apeqqutigisannut qujanarujussuaq.

Apeqqutitit matuma kinguliani akineqarput:

1. Illunik pitsanngorsaanissamut atugassamik kontoqanngilaq, taamaattorli atorsinnaanngitsortaat (soorlu kiassaatit) paasilluarsimaleriarutsigit suliffeqarfimmut suliakkiissaagut.
2. Klubbip imermik pilersorneqalernissaanut pilersaaruteqartoqarnersoq ilisimasaqarfiginngilarput.
3. Illup iluarsartuunnissaanut suliakkiissummik nassiussisoqareerpoq, tassani kiassaatinut tunngasut ilaatinneqarput.
4. Ataatsimut isigalugu ajornersaat sulissutigineqarput. Assersuutigalugu nutaamik kissarsuutitaassasoq pilersaarutaavoq, aamma sofassarsiuussineq nutaanillu nerrivittaarnissaa sulissutigineqarpoq.
5. Nunaqarfiit tamakkerlugit mobiltelefonitaarnissaat sulissutigineqarpoq. Taannartaali suli inissivinneqanngilaq
6. Nunaqarfinnimi fritidsklubbit qarasaasianut attavilersuisoqarsimanngippat e-mailinik atuinissaq ajornakusuussaaq. Tamanna pillugu kommunimi innuttaasunik kiffartuussivimmi qarasaasiamik atuisinnaalernissaat maannakkut sulissutigineqarpoq. Taamaalilluni sulisut tamarmik immikkut e-maileqalersinnaaniassammata.

Ataatsimut isigalugu oqaatigisinnaavarput, eqqaaneqartut amerlanerit eqqumaffigigatsigit. Nammineerluta suliarisinnaanngisagut suliffeqarfimmut suliakkiutigiumaarpagut. Ataatsimut isigalugu nunaqarfinni klubbit pitsanngorsaavigineqarnissaat sulissutigineqarpoq. Tassunga atatillugu aamma eqqaasinnaavarput, Meeqqanut Atuarfeqarnermullu Ingerlatsivimmi kommunimi klubbinut immikkoortumut pilersaarummik suliaqartoqarmat.

Inussiarnersumik inuulluaqqusillunga

Ole Jakobsen, Kommunaldirektøri