Partiit qinigassanngortittulluunniit kissaatigigunikku qinigassanngortinnermut illunut qineqqusaarutinik saqqummiussisoqassasoq, taava illumik piginnittoq isumaqatigiissuteqarfigineqassaaq.
Kommunimi qulliit sarfaliorfiillu napparutai Nukissiorfiup pigivai, taamaattumillu qinersinermi allagartarsuarnik ikkussuinermi maleruaqqusai malinneqartariaqarput. Maleruagassat uani atuarneqarsinnaapput: [https://nukissiorfiit.gl/da/Nyheder/2025/Ophaengning-af-valgplakater].
Taassuma saniatigut oqaatigineqassaaq kommune tamakkerlugu aqquserngit taaguutaasa napparutaanni qineqqusaarutinik ikkussuineq inerteqqutaammat.
Qinersiviit/init qinersiviusut tungaannut isaarissani iluiniluunniit qineqqusaarutinik saqqummersitsineq ullormi qinersiviusumi inerteqqutaavoq.
Kommuneqarfik Sermersuumi qinersereernermiit ullut arfineq-pingasut qaangiunneranni qinersinermi allagartarsuit qinersinermilu atortut allat peerneqarsimanngitsut pillugit peqqussuteqarneq ileqquuvoq. Peqqussutigineqartoq malinneqanngippat qineqqusaarutit peerneqassapput, qineqqusaartup imaluunniit partiip akiligassaanik.
Aqqusinerni qinersinermi allagartarsuarnik ikkussuineq:
- Ikkussuineq aqqusinerni qulliit napparutaanni taamaallaat ikkussuisoqarsinnaavoq, angissusaalu 0,8 kvm-imit anginerussanngilaq, sanimullu 0,8 m-imit anginerussanani. Taakkua saniatigut Nukissiorfiup aqqusinermi qulliit napparutaanni innaallagissanullu napparutini qinersinermi allagartarsuarnik ikkussuinermut maleruaqqusai malinneqassapput.
- Allagartarsuit tamakkiisumik ilaannakortumilluunniit angallannermi allagartat angallannermilu kalerrisaarutit asseqqassanngilaat arlaannaatigullu angallannermut ajoqutaassanngillat.
- Allagartarsuit aqqusernit naapiffianniit, aqqusernit paaviniit imaluunniit kaajallattarfinniit 20 m-itut ungasissusillit iluanniitinneqassanngillat. Pisuinnaat aqqutaani allagartarsuarnik ikkussuisoqaqqusaanngilaq.
- Allagartarsuit ima inissinneqassapput, napparussuup naqqani nunamiit 3,0 m-imit portunerusumik allagartarsuup ilaannaaluunniit inissinneqarsimassanngilaq. Isumannaallisaaneq pillugu portussusissamut killiliussaq ikkussuinermi aamma inunnut, sakkussanut atortunullu atuuppoq.
- Ikkussuinermi allunaasaq plastikkilluunniit taamaallaat atorneqarsinnaapput (ungerutissiaq ataatsimilluunniit atorneqassanngilaq) napparutit aamma aserorneqassanngillat.
- Kommunip pigisaani, atortulersuutini, aqqusinermi kalerrisaarutini, angallannermi allagartani, angallannermi, kabelinut sikaavinni assigisaaniluunniit ikkussuineq inerteqqutaavoq.
- Qinnuteqartumit nivinngaanermut kiisalu allagartarsuit allunaasallu peerneqarnerannut atatillugu kommunip atortulersuutaani ajoqusiinerit tamakkiisumik akisussaaffigineqassapput.