Aningaasaqarnermut Inuussutissarsiornermullu Ataatsimiititamit ulloq 19. februaari 2025 ataatsimiinnermi aalajangerneqarpoq, illoqarfiup ilaanut pilersaarutissatut siunnersuut 30E13-2-A tamanut tusarniaassutigineqassasoq.
Siunertaa
Illoqarfiup ilaanut pilersaarut suliarineqarpoq Tasiilami sanaartugassatut pilersaarutitut saqqummiunneqartut naammassiniarlugit. Naalakkersuisut aamma Nukissiorfiit pilersaaruteqarput erngup nukinganik nukissiorfik allilerneqassasoq erngup nukinganik nukissiorfimmut tapertatut pilersitsinikkut.
Pilersaarummi siunertat tunngaviillu:
- Tasiilami erngup nukinganik nukissiorfiup allilernissaanut periarfissamik pilersitsinissaq.
- Sanaartorfissanik immikkoortitsinissaq, imertartarfiliinissaq, erngup nukinganik nukissiorfiliornissaq, penstor-rørføring aammalu erngup kuuffissaanik tasinngortaliornissaq.
- Qaartiterutissaasiviup pioreersup sioqqallu najukkami pilersaarutip suliarinissaanut betoniliornissamut atorluarnissaannut periarfissiinissaq.
- Aqqutikkut pioreersukkut nunaliarluni sukisaarsaariarsinnaaneq qulakkeerneqassasoq.
Tamanut oqallisissiaq
Pilersaarutitut siunnersuut piffissami 5. marsip – 16. apriilip 2025-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput apriilip 16-at 2025 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Immikkoortumut pilersaarutitut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit immikkoortumut pilersaarutip imaluunniit immikkoortumut pilersaarutip inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Illoqarfiup ilaanut pilersaarutissatut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviinut imaluunniit Sanarfinermut Avatangiisinullu Ingerlatsivimmut 36 74 00-imut saaffiginninnikkut pissarsiarineqarsinnaavoq.