Aningaasaqarnermut Inuussutissarsiornermullu Ataatsimiititap novembarip ulluisa 7-ni 2024 aalajangerpaa, immikkoortumut pilersaarummut siunnersuut 1C9-1 Kujallerpaat tamanut tusarniaassutigineqassasoq.
Siunertaa
Kommunimut pilersaarummut tapiliussatut siunnersuut 1A1-6 siusinnerusukkut tamanut tusarniutigineqarnikuuvoq, tusarniummullu akissuteqaatit kommunimut pilersaarut 2036-kkut tiguneqartut tunngavigalugit malunnaatilimmik allannguisoqarpoq. Taamaattumik siunnersuut nutaamik tusarniaassutigineqassaaq.
Allannguutit makkuupput:
– immikkoortup ilaata A-inissiaqarfimmiit C-illoqarfiup qeqqani siunertanut allanngorneratigut illoqarfiup qeqqani siunertanut pilersitsisoqarsinnaanngussaaq.
Immikkoortup ilaanut kommunimut pilersaarut 2036-itut siunnersuummi pingaarnertut aalajangersakkat allanngortinneqassapput, taamaalilluni siunnersuut matumani pineqartoq immikkoortumut pilersaarut pilersaarusiornermut inatsit naapertorlugu sukumiisunik aalajangersagartalerneqassalluni.
Immikkoortup ilaa Nuup kujataatungaani Paassaasiviup aamma Imarpikkoortaatinut umiarsualiviup akornanni inissisimavoq. Immikkuualuttunut tunngasortaanut allannguutituarissavaa immikkuualuttoq A- mut aamma immikkuualuttoq B-mut ilaatinneqalernerat. Immikkuualuttoq B-mi sanaartorfissat pingasut katinnerisigut sanaartorfissamik annertujaamik atugassanngortitsisoqassaaq.
Sanaartorfissaq periarfissaalersinnaaqqullugu aqquserngit Svend Jungep Aqq aamma Sipisaq Kujallerup allanngortinneqassapput. Tamanna pisinnaaleqqullugu immikkoortup ilaa 1C9-mi killeqarfilersuineq allanngortinneqassaaq. Immikkuualuttoq A-mi B-milu sanaartorfissat pioreersut aalajangersakkallu tassunga tunngasut nutarterneqassapput.
Tamanut oqallisissiaq
Siunnersuut sapaatip-akunnerini 8-ini tamanut tusarniaassutigisassanngorlugu saqqummiunneqassaaq, piffissami 11. novembari 2024 – 13. januaari 2025.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput januarip 13-at 2025 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissarititap iluani tiguneqartut Kommunalbestyrelsip Immikkoortumut pilersaarutip inaarutaasumik suliarineranut ilaatinneqassapput.
Inatsisinut tunngasut
Immikkoortumut pilersaarutitut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit immikkoortumut pilersaarutip imaluunniit immikkoortumut pilersaarutip inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Immikkoortumut pilersaarut kommunip nittartagaani www.sermersooq.gl-imi tusarniutit ataani atuarneqarsinnaavoq, kommunimi innuttaasunik sullissivimmi, kommunillu nittartagaani www.sermersooq.gl imlt. Sanarfinermut Avatangiisinullu ingerlatsivimmut oqarasuaammut 36 74 00-imut sianerluni saaffiginninnikkut pissarsiarineqarsinnaavoq.