Aningaasaqarnermut Inuussutissarsiornermullu Ataatsimiititamit novembarip ulluisa 7-ni 2024-mi ataatsimiinnermini aalajangerneqarpoq, Kommunimut pilersaarummut 2036-mut siunnersuut tamanut tusarniaassutigineqassasoq.
Siunertaa
Siunnersuut Kommunimut pilersaarutip atuuttup 2032-p ilaanik iluarsiineruvoq, taanna Pilersaarusiornermut periusissiaq 2023 politikkikkut aalajangigaavoq pilersaarusiornerlu pillugu inatsit naapertorlugu ukiut sisamakkuutaarlugit nutarterneqartartussaavoq. Kommunimut pilersaarummut nutaatut siunnersuut digitalimik uani takuneqarsinnaavoq: https://kp.sermersooq.gl/forslag-gl/
Pilersaarummut tunngavioreersoq (Kommunimut pilersaarut 2032) kiisalu Pilersaarusiornermut periusissiaq 2023 tunngavigalugit Sermersuumi pingaartinneqartut nutarterneqarlutillu allaffissornikkut allannguiffigineqarput. Pilersaarusiornermut inatsit nutaaq tunngavissiivoq immikkoortut ilai atorneqarnissai pillugit aalajangersakkat allaqqinneqarlutillu iluarsaanneqarnissaannik. Peqatigitillugu pilersaarusiornermut inatsit immikkoortussanik atugassanngortitsinissamut periarfissiivoq, tamannalu ilaatigut Nuummi Kuanninnguit alliartortinneqarnissaanut atorneqarpoq. Kommunimut pilersaarut 2036 aamma digitalimik nunap assiliornerulernermik nassataqarpoq, tamatumani qulakkeerneqarluni kommunimut pilersaarut pilersaarusiorfiup ingerlanera tamaat sakkussatut atortuarneqarnissaa. Siunnersuutip allaffissornermi tunngavissaq kommunimilu sullissineq pitsaanerusoq qulakkiissavai.
Tamanut oqallisissiaq
Siunnersuut tamanut tusarniaassutigisassanngorlugu saqqummiunneqassaaq, piffissami 11. novembari 2024 – 13. januaari 2025.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput januaarip 13-at 2025 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarutip inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut siunnersuut kommunip nittartagaani www.sermersooq.gl tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.