Aningaasaqarnermut Inuussutissarsiornermullu Ataatsimiititap ulloq 22. aggusti 2025 ataatsimiinnermini aalajangerpaa illoqarfiup ilaanut pilersaarutissatut siunnersuut 4D2 tamanut tusarniaassutigineqassasoq.
Siunertaa
Immikkoortup ilaani assigiinngitsorpassuit suliaqartarput, taamaattumillu immikkoortup ilaanik piujuartitsisumik ineriartortinneqarnissaa pillugu pingaarnertut aaqqissuussamik peqalernissaq pisariaqalersimavoq. Illoqarfiup ilaanut pilersaarutimmi immikkoortup ilaa sukisaarsaartarfittut atuuffeqartunut aamma sammisaqartitsinernut qitiusoqarfinngortinneqarnissaannut ineriartortinneqarnissaa iluaquserneqassaaq, tassani Kuanninnguini sukisaarsaartitsinerit ilaneqarnerannut atatillugu aammalu mittarfiup eqqaani immikkoortut ineriartortinneqarnissaat pillugit. Illoqarfiup ilaanut pilersaarummi klubbit illutaasa ataavartumik inissisimaffiinut pingaarnertut pilersaarut qulakkeerneqassaaq. Taamaalilluni immikkoortumi ataatsimut ataavartumik klubbinik pilersitsisoqarsinnaassaaq ornikkuminarnerusunik aamma pitsaanerusunik biilinut inissiivilinnik, biilinut inissiivik pioreersoq allineqarpat.
Pilersaarummi siunertat tunngaviillu:
- Immikkoortup atorneqarneranik ersarissumik siunissamillu qulakkeerinnittumik pilersitsineq.
- Illoqarfiup ilaanut pilersaarutitigut immikkoortut sukisaarsaartarfiit pioreersut, ullumikkut pingaarnertut ukiumi sisorarnermut, soorlu sangusaarluni sisorarnermut aamma qamuteralannik angalaarnermut atorneqarnerusartut, ukioq tamaat assigiinngitsunut siammasinnerusunut atorneqarsinnaanera ilaatigut qulakkeerneqarpoq.
- Illoqarfiup ilaanut pilersaarutitigut immikkoortup atuuffia sunngiffimmi sammisassaqartitsiniutinut illoqarfimmi katersuuffittut atorneqarnerulernissaa kissaatigineqarpoq, saniatigullu nuna, pinngortitamik illersuinissaq aamma piujuartitsisumik nunaminertamik atuinissaq eqqarsaatigineqarput.
Tamanut oqallisissiaq
Pilersaarutitut siunnersuut piffissami 10. septembarip – 22. oktobarip 2025-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit kingusinnerpaamik oktobarip 22-at 2025 uunga nassiunneqassapput: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Illoqarfiup ilaanut pilersaarutissatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Illoqarfiup ilaanut pilersaarutissatut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviinut imaluunniit Sanarfinermut Avatangiisinullu Ingerlatsivimmut 36 74 00-imut saaffiginninnikkut pissarsiarineqarsinnaavoq.