Sanarfinermut Avatangiisinullu Ingerlatsivimmit Ittoqqortoormiini ATV-nut aqqutiliornissamut ikaartarfiliornissamullu nunaminertamik qinnuteqaat tiguneqarpoq.
Pilersaarummi illoqarfiup attaveqaasersuutai angallannerlu pitsaanerulersinneqarnissaat kiisalu ATV-nut aqqutitigut illoqarfimmi immikkoortut atassuteqalersinnissaat siunertaavoq. Tamatuma saniatigut aasaanerani aaqqissuussisoqarsinnaalernissaa, ataatsimoorluni nuniagiartoqarsinnaalernissaa, illoqarfimmi innuttaasut kikkulluunniit iluaqutigisinnaasaannik arpalluni cykelerlunilu unammisitsisoqarsinnaalernissaa kiisalu Ittoqqortoormiini inuunerissaanissaq ataatsimoornerusarnissarlu siunertaapput.
ATV-nut aqqut katillugit 6 km-inik takissuseqassaaq. 20 fodsit aamma 40 fodsit flat racks-it (containerit siaartittakkat) kuuit qulaallugit qajannaatsumik ikaartarfittut atorneqassapput, betoninik qajannaallisakkanik sukaqassapput, taamatullu periuseqarneq sivisuumik atatitsisuullunilu aningaasartuutaannginnerussaaq. Ikaartarfiit 3,5 m. miss. silissuseqarlutillu 20-30 cm.-imik portutigissapput, nuna apeqqutaalluni.
Kommunimi pilersaarut 2036 qinnuteqaammut pilersaarummut tunngaviuvoq. Immikkoortoq 40D5 Qimmiliviup ilagaa, tassa sukisaarsaartarfittut, matumani qimmilivittut, atugassiaavoq kiisalu immikkoortoq O2 Asi sanaartorfiusussaanngitsutut atugassiaalluni.
Immikkoortuni sanaartorfigeqqusaanngitsuni tunngaviusumik talittarfinnut ikaartarfiit, aqqusineeqqat, assakaasullit ingerlavii aqqusernilluunniit sananeqarsinnaanngillat taakku takornariaqarnermik siuarsaanermut, inuussutissarsiutinut tunngasunik imaluunniit illoqarfiup qanittuani timaani sukisaarsaartarfittut atorneqarnianngippata.
Suliaq Inoqarfinnut Ataatsimiititami politikikkut suliarineqassaaq.
Qinnuteqaammut oqaaseqaatissaqaruit Sanarfinermut Avatangiisinullu Ingerlatsivimmut kingusinnerpaamik ulloq 24.04.2026-mi nassiunneqassapput.
Tusarniaanermut akissutit BOG-2020-11112-423-mik nalunaaqutseqquneqarput.
Akissutit uunga nassiunneqassapput:
Kommuneqarfik Sermersooq
Sanarfinermut Avatangiisinullu Ingerlatsivik
Nunaminertanut Sanaartornermullu Oqartussaqarfik
Postboks 1005
3900 Nuuk
Flat racks:
