Kommunalbestyrelsep ataatsimiittarfia februaarip ulluisa qulinganni Inuusuttut kommunalbestyrelsiannit ataatsimiiffigineqarpoq, tassa inuusuttuaqqat 21-t 7. Klasseniit 9. klassit tungaanut atuartut Kommuneqarfik Sermersooq-miik katersuummata, peqataasoq ataaseq sinniisuulluni. Atuartut Kapisilinniit, Paamiuniit, Ittoqqortoormiiniit, Kulusummiit, Kuummiuniit, Sermiligaarmiit, Tasiilamiit, Qeqertarsuatsiaaniit Nuummiillu isiginnaarut atorlugu ataatsimiipput.
Peqataasut angajullersaat, Maya Natuk Fleischer Nuummi Atuarfik Hans Lyngemi atuartoq, Inuusuttut kommunalbestyrelsiata innersuussutaat kommunalbestyrelsemut ulloq naanerani ataatsimiiffimmi tunniukkamigit ima oqaasertalerpaa:
“Siullermik kommunalbestyrelsemut qujarusuppunga meeqqat Inuusukombest aqqutigalugu nipimik tunimmatigut. Oqariartuutivut inuiaqatigiinnut iluaqutaasinnaammata nuannaarutigaarput. Aamma aaqqissuussamut suliaqarsimasut tamaasa qujaffigerusuppagut. Uagut Inuusukombestimiit neriuutigaarput peqqussutigut kommunalbestyrelsemiit tigulluarneqarumaartut, piviusunngortillugillu.
Demokrati kommuunimilu qanoq sulisoqartarnersoq paasisimaqarnerunissaat anguniarlugu Inuusuttut kommunalbestyrelsia pilersinneqarnikuuvoq.
“Meeqqat ulluinnarni atugarisaat kiisalu sunngiffimmi sammisassaat pillugit oqaloqatigiinnikkut anguneqartartut paasivara,” Erina Jensen, 12-nik ukiulik, sinniisoq, Nuussuup Atuarfia.
“Nuannisaqaanga, aamma kommunalbestyrelsi qanoq aalajangertarnersut ilikkarpara,” Uiloq Christensen, 12-nik ukiulik, Atuarfik Samuel Kleinschmidt.
“Paasisaqarluaqaanga, soorlu pinngortitaq qanoq paarineqarsinnaaneranik pillugu innersuussutit assigiinngitsut meeqqaniit inuusuttuneersullu,” Mads Christensen, 14-nik ukiulik, Atuarfik Ukaliusaq.
Akunnerit arfinillik ingerlanerani nuannaartoqarlunilu soqutiginnittoqarpoq.
Borgmesteri Charlotte Ludvigsen: “Nuannaarutigeqaara piviusorsiorluartunik pitsaalluinnartunillu Inuusukombest peqqussutiliorsimammata, assut qamuuna attortippunga. Peqqussutaat misissuataarneqarumaarput suliarineqaqqillutillu. Oqariartuutaat inuiaqatigiinnut pingaarutilipilorujussuuvoq, siunissaq qanoq isikkoqarumaarnersoq pissanganarpoq.
COVID-19 ajornartoortitsinera peqqutigalugu ukioq kingulleq aalajangerneqarnikuuvoq Inuusuttut Kommunalbestyrelsiata ataatsimiinera digitaliusumik ingerlanneqarumaartoq.