Kommuneqarfik Sermersooq 2015-imi siullermeerluni ineqarnermut isumaqatigiissusiormalli, piffissaq utaqqiffiusartutut ilimagineqartoq ukiunik sisamanik sivikillineqarpoq. Aammami piffissami tamatumani Nuummi innuttaasut 1.300-nik amerleriarsimapput.
Nuuk alliartupiloorpoq, ukiunilu tallimani kingullerni innuttaasut 1.300-nik amerlisimapput. Ukioq kingulleq amerlanerpaaffissaminniipput, tassani Nuummi innuttanngortut 400-nik ilammata. Piffissami tassani ISERIT aqqutigalugu inissarsiortut utaqqisunut allattorsimaffianni piffissaq utaqqiffigisartagaattut missiliuussaq ukiut 15-iniit 11-nut ikileriarsimavoq.
”Inissiat 416-it attartortinneqarput, taakkulu attartortinneqanngippata utaqqisut allattorsimaffiannut allatsissimasut amerlaqataat suli ukiorpassuarni utaqqisimassagaluarput. Kommunip inissianik attartortitsisarnera taamaasilluni utaqqisut allattorsimaffiannik pakkersimaartitsivoq, utaqqisullu allattorsimaffianni allatsissimasorpassuit neriuuteqalersillugit”, ISERIT-imi pisortaq Torben Kortegaard oqarpoq.
Nuummi inissaaleqineq kikkunnut tamanut erseqqippoq, amerliartortummi illoqarfimmut nuunnissartik toqqartalermassuk inissarsiortut amerliartuinnavilerput. Naallu kommune inissiarpassuarnik hunnorujut arlalinnik pissarsigaluartoq, noqqaasut suli amerleriaateqarnissaannik kinguneqarsinnaavoq.
”Tassami Nuummi nuttartut sanaartornerullu akornanni sakkortuumik angummanniartoqarpoq. Aammami inissianik nutaanik peqalernera utaqqisut allattorsimaffiannut allatsissimanikut ilaannut allatsinnissamut kajumissaarutaasinnaavoq, sanaartortoqangaatsiartoq takusinnaagamikku, Torben Kortegaard oqarpoq.