Peqatigiiffinnut sæson nutaaq aallartippoq

Ukiariartornera sæsoni nutaap aallartillualereerneranik ilisarnaataasarpoq. Naak nappaassuaq Covid-19 sutigut tamatigut ajornartoortitsigaluartoq, neriuppugut timersoqatigiiffissi ingerlalluarumaartoq.


Tapiisarnermut maleruagassat

Peqatigiiffinnut tapiisarneq pillugu maleruagassaq malillugu novembarip aallaqqaataatinnagu allagartat uppernarsaatit Kommuneqarfik Sermersuup Peqqinneq Susassaqartitsinermullu immikkoortortaanut nassiunneqareersimassapput.

Allagartat uppernarsaatit tunniunneqartussat ukuupput:

  • Malittarisassat pilersitsilluni ataatsimeersuarnermi suliarineqartut
  • Missingersuutit ataatsimeersuarnermi akuerineqartut
  • Ataasimeersuarnermit imaqarniliaq
  • Ilaasortat allattorsimaffiat, kiisalu
  • Siulersuisut katitigaanerat

Allagartat uppernarsaatit uunga ikineqassapput: https://peqatigiiffiit.brnd.com/ tassanilu peqatigiiffiup isertaata atorneqassaaq. Allagartat uppernarsaatit qanoq ikkunneqarsinnaaneranut ilitsersuut www.sammisat.gl -imi nassaarineqasinnaavoq.


Meeqqanik pinerliisimannginnermut uppernarsaat

Minnerunngitsumillu peqatigiiffiit pisussaaffeqarput 15-init ataallugit ukiulinnut atassuteqartut pillugit meeqqanik pinerliisimannginnermut uppernarsaammik aallerfigisinnaatitaagaat atsiortsereernermikkut, tamannalu eqquutsinneqanngippat peqatigiiffiup iluani 15-init ataallugit ukiulinnut pineqartoq attuumassuteqaqqusaanani. Taannalu isumagineqarsimappat nittartakkami uani https://peqatigiiffiit.brnd.com/ aallersimanermut uppernarsarnissaa pingaaruteqarpoq, uppernarsaallu oktobarip naannginnerani tunniunneqareersimassaaq. Meeqqanik pinerliisimannginnermik allagartaq peqatigiiffimmiit takuneqareerpat, uppernarsaat atuarneqarsinnaajunnaarlugu alittorneqassaaq.

Peqqinneq Susassaqartitsinerlu
+299 36 80 00
kommuneqarfik@sermersooq.gl

Kuussuaq 2, PO 1005
3900 Nuuk