Nuummi inuussutissarsiornermik ingerlataqartut pingaaruteqarnerpaat G20-mik taallugit Sermersuumi Inuussutissarsiornermut Immikkoortortamit katersuutsinneqarput. Suleqatigiit ippassarli Hotel Hans Egedemi pilersinnissaannut katersuutsinneqarnerini sulilerlutik aallartereerput, ilaatigullu mittarfittaassaq atulerneranilu periarfissat immikkut sammineqarlutik.
Nuummi inuussutissarsiortut ingerlalluarnerpaat G20-mik taallugit siullerpaamik katersuutsinneqarmata, Nuummi mittarfissaq pingaarnerpaatut oqaluuserineqarpoq.
”Inuussutissarsiortut takoriikkatsitut G20-mik annertuumik tapersersuinerat assut nuannaarutigaarput. Taamatut suleqatigiilerneq peqataasunut tamanut inuussutissarsiortunullu allanut iluaqutaassaaq”, Kommuneqarfik Sermersuumi Inuussutissarsiornermut chefi Emil Skjervedal oqarpoq.
Mittarfittaassaq aallartinneraniilli qitiutinneqartoq
Illoqarfiit pingaarnersaanni inuussutissarsiuteqarnerup siuarsarneqarnera ingerlaannaq aallartinniassammat, inuussutissarsiortut katersuutsinneqarsinnaammata Borgmesterimit, Charlotte Ludvigsenimit, nuannaarutigineqarportaaq.
”Mittarfittaartussaalluta nalunngilarput, aamma timmisartorsuit missinnaalissapput taamaalillunilu Nuuk nunarsuup sinneranut attaveqarnera qaninnerulerluni. Aamma nalunngilarput issiaruusaarluta tamakku pinissaat utaqqisinnaanatigit. Taamaattumik mittarfeqarnikkut periarfissatsialassuup qanoq atorluarneqarsinnaanera ataatsimoorullugu maannangaaq paasinialereerparput,” Borgmesteri Charlotte Ludvigsen, oqarpoq.
Inuussutissarsiortut peqataanerisa saniatigut politikerit arlallit, Kommuneqarfik Sermersuumit atorfilittat kiisalu siunissaq pillugu ilisimatuut peqataatitaqarput. Nuummi mittarfittaarnikkut ineriartortitsinissamut periarfissat sammisaralugit ippassaq workshoppertitsisoqarnerani angusat nalunaarusiornikkut katersuunneqassapput.