Namminersorlutik Oqartussat Sermersooq inatsisinik unioqqutitseqqullugu kimigiiserfigaa.

Ukioq manna Inunnik paasissutissanik suliarinnittarneq pillugu inatsit atuutilerpoq. Inatsimmi inuit paasissutissanik inunnut tunngasunik, ullumikkut pisortanit pigineqartunik mianernartunik qulakkeerinniffigineqarlutik illersorneqartussaapput. Tamakkununnga ilaapput ilaatigut sumi najugaqarnermik, sumi inissiami najugaqarneit, aammalu ineqarnermut qanoq akiliuteqartarnersutit pillugit paasissutissat. Paasissutissat tamakkua Kommuneqarfik Sermersuup inissiaatileqatigiiffianut Iserit A/S-imut kisimik attuumassuteqarput, kommunimi allaffeqarfimmut attuumassuteqaratik. Taamaattumik Iserit A/S paasissutissanik taakkuninnga kisimi aallersinnaatitaavoq. Taamaakkaluartoq Namminersorlutik Oqartussat piumasaqartarput, Kommuneqarfik Sermersooq inissianik attartornermut isumaqatigiissutinik 300-nik pissarsiniassasoq.

”Namminersorlutik Oqartussat suleqatigerusuppagut, kisianni inatsimmik unioqqutitsisinnaanngilagut, inuillu pillugit paasissutissat pillugit inatsit erseqqereerpoq. Kommunip allaffeqarfia inissianik attartornermut isumaqatigiissutinik atorfissaqartitsinngilaq, taamaattumillu taakkunnnga tigummisaqarsinnaanani”, Charlotte Ludvigsen oqarpoq.

Kommuneqarfik Sermersuup Namminersorlutik Oqartussat qasseeriarlutik erseqqissaaffigisarpai, kommune inatsisinik unioqqutitsilluni ineqarnermut isumaqatigiissutinik pissarsiniarsinnaanngitsoq, taamaattumillu taakkuninnga tunniussisinnaanngitsoq. Kisianni Namminersorlutik Oqartussat ilisimasaarinerit tusarumanngilaat, isumaqatigiissutinillu tunniussinissarput piumasaqaatigiuarsinnarlugu.

”Arlaanik peqquteqartumik Namminersorlutik Oqartussat inissiaatitsinnik uumitsaassisimavoq, tupaallaatigaarali uatsinnik unitsitsiniaanerminni innuttaasut tunngaviusumik pisinnaatitaaffiinik soqutiginninngimmata.”

Kommuneqarfik Sermersooq inatsisinik unioqqutitsilluni inissianik attartornermut isumaqatigiissutinik pissarsiniarsinnaannginnera pillugu kommunip eqqartuussissuserisuminit uppernarsereerpaa, kisianni sooq Namminersorlutik Oqartussat isumaqatigiissutinik piumasaqarnersut Sermersuup paasiuminaatsippaa.

”Isumaqarsimavugut suliami matumani inissiat attartorteqqinneqaraangaata kommunit qanoq ilillutik ineqarnermut akiliutinik tapiisinnaanerat matumani pineqartoq. Tamanna pillugu isummernissamut atugassanik inuit namminneq ineqarnermut isumaqatigiissutaannik 300-nik pissarsisariaqarneq sumik tunngaveqarnersoq paasiuminaatsipparput”, Charlotte Ludvigsen oqarpoq.