Angajoqqaanut kaammattuut: Meeqqasi eqqumaffigisigit

Nuummi atuarfiit marluk aserorteriffigineqarsimapput, Ukaliusap Atuarfia aamma Atuarfik Samuel Kleinschmidt.

Septembarip ulluisa 17-iata unnuaani Atuarfik Samuel Kleinschmidtimi igalaat 16-it aserorterneqarsimapput, tamatumalu saniatigut Ukaliusap Atuarfiani igalaat arlallit aserorterneqarsimallutik.

- Atuarfinnut taama aserorteriffiusimasunut takkulluni ilinniartitsisunut, atuartunut angajoqqaanullu takusaq tujorminarpoq. Atuartunut sulisunullu atuarfigisaq taama pineqarsimasoq takullugu toqqissisimajunnaarsitsivoq. Kingorna aserornikunik katersineq torersaanerlu nukippassuarnik atuiffiuvoq, atuartitsiniaraluarnerlu pimoorunneqanngitsoorluni, Lone Nukaaraq Møller, Meeqqanut Atuarfeqarnermullu Ingerlatsivimmi pisortaasoq oqarpoq nangillunilu:

- Kommune atuarfiullu aqutsisui suliniutinik pitsaaliuinermut tunngasunik assigiinngitsunik misileraagaluarput, taamaattoq aserorterinerujussuup unitsinnissaanut Nuummi innuttaasunit ikiorneqartariaqarpugut. Angajoqqaat meeqqaminnik oqaloqatiginninnissaannut unnukkullu illoqarfimmiittarnerisa nakkutigisarnissaannut kaammattorpavut. Inuusuttut aserorterisartut amerlagunanngikkaluartut, inuusuttut allat aserortereqataarusunnginnermik oqaaseqartalersinnaanerat aserortererusukkunnaarnermik kinguneqarsinnaavoq. Innuttaasuttaaq tamaasa unnukkut atuarfinnik nakkutiginninnerulernissaannik ikiuuteqqullugit kaammattorusuppavut.

Meeqqanut inuusuttunullu assigiinngitsunik sammisassaqartitsinissaq Kommuneqarfik Sermersuumit annertuumik iliuuseqarfigineqarpoq. Aasap ingerlanerani ilaatigut isikkamik arsarnermik ilinniarneq, assammik arsarnermik ilinniarneq, qalipaanermik ilinniarneq, allannermik ilinniarniarluni workshoppertitsineq Parkourilu sammisassaqartitsissutigineqarput. 

Aasaanerani atuanngiffeqarnerup kingorna maanna atuartut atualeqqinneranni atuareernerup kingorna sammisassaqartitsinissaq Peqqinneq Susassaqartitsinerlu pillugit Immikkoortortaqarfimmiit isumagineqarpoq. 

Meeqqanut inuusuttunullu amerlasoorpassuarnik sammisassaqartitsisoqaraluartoq, arlaqarput neqeroorutinik atorluaanngitsunik.