Nipilersornermik Ilinniarfik aalajangersimasumik illutaartinneqarpoq

Nuummi Nipilersornermik Ilinniarfik nutserpoq, illumullu ataatsimut meeqqat inuusuttullu nipilersornermik nuannarisallit katersuussinnaalerlugit. Init mikisunit nipilersornermik ilinniartitsiffiunissamut naleqqutinngitsut, ininik angisuunik pitsaanerusunillu taarserneqarput.

Nipilersornermik Ilinniarfik siornatigut Nuup Saavani aammalu AKO-milu Illu-mi inissisimanikuuvoq. Taamaakkunnaarnikuuvorli, aammalu Nipilersornermik Ilinniarfimmik atuisuusut tamarmik siunissami Mikimi ilinniartinneqartalissapput. Miki Nuummi Ilinniarnertuunngorniarfiup kollegiaata aappaluttup akiani inissisimavoq.

Avatangiisit toqqissisimanartut

Aamma tassani Nipilersornermik Ilinniarfimmi ilinniartitsisut meeqqat qanimut suleqatigilertussaavaat, peqatigitillugulu ilinniartoq inini toqqissisimanartuni aalajangersimasumik illutaarnerminni ilinniartinneqarsinnaalissapput.

-Nuunnissatsinnut pissutigaarput meeqqat tamarmik illumi ataatsimoortillugit toqqissisimatinnissaat. Amerlasuutigut imaattaraluarami, tusarnaartitsisoqaleraangat aatsaat naapittarlutik, pissutigalugu ilinniartut ilaat Illumi sungiusartaramik, ilaallu illumi Nuutoqqamiittumi sungiusartarlutik. Maannakkulli tamarmik illumi ataatsimi sungiusarsinnaalerput, ataqatigiinnerallu pitsaanerulersinnaavoq, Nipilersornermi Ilinniarfimmi aqutsisoq Pipaluk Lynge Berthelsen nassuiaavoq.

Aamma containeri taarserneqassaaq

Nipilersornermik Ilinniarfiup containeriani nipilersullaqqissut sungiusartartut manna tikillugu containerimi sungiusartassapput. Taannali Mikip eqqaanut kingusinnerusukkut nuutinneqassaaq.

Aamma siunissami Mikimi Nipilersornermik Ilinniarfik tusarnaartitsisassaaq, Pipaluk Lynge Berthelsenip nuannaarutigeqisaanik.

- Maannakkut meeqqat inuusuttullu tullianik sumi tusarnaartitsisoqassaneranik ernumassutaarutissapput, maannami aalajangersimasumik illutaareerpugut, tamannalu nuannaarutigaarput. Suut tamarmik inissinnissaannut qilanaaqaagut, taanna unnersiorpoq.