Namminersorlutik Oqartussat kommunip inissiaataanik nakkutilleerusupput

Namminersortut inissiaataannik attartorluni Kommuneqarfik Sermersooq innuttaasunut attartortitsinermigut Nuummi inissianik 300-nik pissarsivoq. Namminersorlutik Oqartussat isumaqarput periuseq unioqqutitsinerusoq, taamaattumillu kommunimut nakkutilliiartortitsillutik.

Kommuneqarfik Sermersooq Nuummi pisortat inissiaataannik pissarsiniarnermini inatsisinik unioqqutitsiva? Taamatut isumaqarpoq Namminersorlutik Oqartussani Nunamut Namminermut Immikkoortortaqarfimmi Nakkutilliisoqarfik. Innuttaasunummi inissianik pissarsiniarneq ilumut kommunip suliassarineraa nakkutilliisut apeqquserpaat. Qaammatit arfineq-pingasut ingerlaneranni nakkutilliisut piumasaqaateqartarput aammalumi Kommuneqarfik Sermersooq qanoq ililluni inissianik pineqartunik attartortitseqqittarnersoq pillugu allagaatit quppernerit 70.000-it sinnillit pissarsiarisimallugit, tamannali naammagisimaarneqanngilaq. Taamaattumik ullumikkut Namminersorlutik Oqartussat Kommuneqarfiup Allaffianut nakkutilliiartorlutik takkussimapput.

”Allagarpassuarnik tunniussissasugut piumaffigineqarnikuuvugut, aammalu kissaatigineqartut tamakkerlugit tunniunnissaat naammassivarput, kisianni Namminersorlutik Oqartussat kissaatigivaat uppernarsaatinik takussutissaanngitsunik pissarsinissartik, aammalu uppernarsaatit inummut tunngasut pissarsiarinissaat kissaatigalugu, soorlu Iserit A/S-ip attartortullu ataasiakkaat akornanni isumaqatigiissutigineqartut. Uppernarsaatit tamakkua inuit pillugit paasissutissanut tunngasunik inatsit naapertorlugu kommunimit pigineqartussaatitaanngillat, taamaattumillu soorunami taakkua tunniussinnaanngilagut", Borgmesteri Charlotte Ludvigsen oqarpoq.

Piffissaq tamaat nakkutilliiartorfigineqarnermi Kommuneqarfik Sermersuup Namminersorlutik Oqartussat oqaloqatiginiartaraluarpai, namminnerli saaffiginnissutiminnut akissuteqarfigineqartarsimanatik.

”Suliami matumani pisortat suliffeqarfiutaasa qanoq ingerlasarnerat pillugu assersuutissat ajornersaasa ilaattut takussutissaqartippara.  Namminersorlutik Oqartussat uatsituulli inuit pitsaasumik inissaqartinnissaat soqutigisariaqarpaat, inissaaleqinerujussuulli ataatsimoorluta qanoq aaqqiissuteqarfigineqarnissaanik oqaloqatigiinnissamut taarsiullugu, Namminersorlutik Oqartussat uatsinnut akerliliinissartik toqqarpaat", Charlotte Ludvigsen oqarpoq.

Inissianut tunngasumut suliap ingerlarnga tamaat uani takuuk:

Pisimasunik Tulleriissaarineq


Allagaatit quppernerit 70.000-it