Kammagiit nalliuttorsiormat kaffi, kaagit qissattaatillu atorlugit nalliussisoqarpoq

Akunnaatsuliilluni inuuissiornerit nalliuttorsiornerillu tamatigut immikkut nalliussineqartassapput, tamannalumi aamma pivoq Kammagiit juulip 27-anni ukiunik qulinngortorsiorluni nalliuttorsiormat. Ukiuni kingullerni qulini sorpassuit allanngorput, ullormilu tassanerpiaq aamma allanngortoqarpoq, ornittagaq nutaamik atserneqarmat.

Erfalasuararpassuit, kaagit pølsillu aappaluttut imaaginnavipput, Kammagiit ukiunik qulinngortorsiorluni nalliussineqarmat, ilaatigut borgmesteri Charlotte Ludvigsen peqataajartorpoq, tassanilu atuisunut ilaqutaasunullu oqalugiarluni.


Ullut nutaat - ateq nutaaq

Kammagiit atuisunut ineriartornermigut akorngutilinnut sammitinneqarpoq, siornatigullu ateqarsimalluni ”Ornittagaq”, kisianni siunissami ateqalissaaq Sammisassaqartitsinissamut katerisimaaqateqartitsinissamullu neqeroorut Kammagiit.

”Imaanngilaq Kammagiinniikkaanni, maanga takkulluni isersimaannartarnissaq. Soorunami aamma taamaaliortoqarsinnaavoq, aammali allanik sammisaqartoqartassaaq, soorlu asimut aalisariarluni, Henrik Gundersen, Kommuneqarfik Sermersuumi najugaqatigiiffinnut immikkoortortami aqutsisoq oqarpoq.


Borgmesteri qissattaatinik tunissuteqarpoq

Kammagiit nalliuttorsiornerani tunissuteqarmat atuisunik qanigisaasunillu qungujutsitsilluarpoq, qungujunnerillu annerulerput ersaattaattoqalerlunilu Borgmesteri Charlotte Ludvigsenip tunissutissani saqqummiummagit.

Tunissutissat tassaapput qissattaatit, aalisakkanut qassutit nuniaatillu, taamaalillutik atuisut saarullinnik aalisariarsinnaanngussammata. Sumiiffimmi taaguutip taamatorpiaq sammisaqartarnissaq siunnerfigimmagu. 


Angerlaqqaarani Kammagiinnut

Gerda Poulsen tassani ukiuni arlalinni sulisimavoq, aammalu ukiuni arlalinni perorsaasutut ilinniarnini pissutigalugu qimassimasimallugu. Ukiut arlallit matuma siornatigut manna meeqqanut neqeroorutaasimavoq, maannakkulli inersimasunut ineriartornermigut akorngutilinnut sammitinneqalerpoq, tamannalu aamma borgmesterip oqalugiarnermini tikippaa.

”Atuisut oqaloqatigisarpavut, suullu uummammiorineraat tusarniartarlugit, malugisinnaavarpullu maaniittarnertik nuannarisorujussuugaat. Assersuutigalugu atuisut ilaat, ilaquttanilu Avannaaniissimapput. Nuummut angerlaramik, angerlaqqaarani toqqaannarluni maannarsimavoq”, Gerda Poulsen oqarpoq.