Isumasioqatigiinnerup Tasiilami aalisarneq ilorraap tungaanut saatissavaa

Kommuneqarfik Sermersuumi inuussutissarsiornermut immikkoortortaqarfik ulluni 20. aamma 21. aggusti Tasiilami aalisarneq pillugu isumasioqatigiisitsissaaq. 

”Kommuneqarfik Sermersooq ukiuni arlalinni tunumi illoqarfitsinni nunaqarfitsinnilu sinerissap qanittuani aalisarneq siuarsarniarlugu anguniagaqarpoq. Nunap immikkoortuani inuussutissarsiutit nutaat pisariaqartinneqarput, ilaatigullu qaleralinniarnissamut periarfissagissaarpoq,” Sermersooq Businessimi pisortaq, Emil Skjervedal oqarpoq.

Kommuneqarfik Sermersuup 2019-imi Tunumi aalisarnermik inuussutissarsiorneq ineriartortinnissaanut Aalisarnermut, Piniarnermut Nunalerinermullu Naalakkersuisoqarfik isumaqatigiissusioqatigaa. Tassanngaanniilli Kommuneqarfik Sermersooq Tasiilami arlaleriarluni pikkorissartitsivoq piniartunuunerusoq aalisarnermut inuussutissarsiuteqarnissaminnut kissaateqartunut. 

”Taamaalilluta aalisartunngorlaat arlallit aallartinnissaannut ikiorsimavagut, taamalu Kuummiuni tunitsivimmut tunisineq annertusisimavoq”, Emil Skjervedal oqarpoq.

Aalisarneq pillugu isumasioqatigiinnermi Tasiilami nunaqarfinnilu sinerissap qanittuani aalisartut 20-t peqataassapput,  Pinngortitaleriffimmit aamma Arctic Prime Fisheriesimit sinniisut peqatigalugit. Sermersooq Business peqataassaaq saqqummersitsilluni sulisunillu peqataasoqassalluni aamma aalisartut inuussutissarsiutiminnik ineriartortitsinissaannut ilitsersorniarlugit.

”Tunumi sinerissap qanittuani aalisarneq siuarsarniarlugu inuussutissarsiullu patajaallisarniarlugu nungusaataanngitsumillu inuussutissarsiutinngortinniarlugu Aalisarneq pillugu Isumasioqatigiisitsineq suliniutit arlallit ilagaat, ”Emil Skjervedal oqarpoq.