Kommuneqarfik Sermersuup Qooqqut Festival aningaasaleeqataaffigaa - Foto: Qooqqut Festival
Foto: Qooqqut Festival

Innuttaasunit nuannarineqarluartoq ornigarneqarluartartorlu Qooqqut Festival Kommuneqarfik Sermersuup Kulturimut Aaqqissuussinermullu immikkoortortaqarfianiit Tapiissuteqartarfimmiillu Sermimiit aningaasaleeqataaffigineqarpoq.

Kommuneqarfik Sermersuumi Kulturimut Aaqqissuusinermullu immikkoortortaqarfiata ilaqutariinnut festivali 100.000 koruuninik aningaasaleeqataaffigaa, Tapiissuteqartarfillu Sermeq 60.000 koruuninik aningaasaleqataalluni.

”Qooqqut Festivali Nuup Kangerluani pinngortitami kusanangaartumi kulturikkut pinngorartitsinermik misigisaqarfiusinnaammat kiisalu ilaqutariinnut tulluarsagaanera, imigassartaqarnanilu tamanut akeqanngitsuummat aningaasaleeqataaffiginera Kulturimut Aaqqissuussinermullu immikkoortortaqarfimminngaanniit nuannaarutigaarput.” Taama oqarpoq Kultureqarnermut Aaqqissuussanullu Immikkoortortaqarfimmi aqutsisuugallartoq Jula Maegaard-Hoffmann.


Periarfissarpassuit

Aaqqissuussinermi programmimi neqeroorutigineqartut assigiinngitsorpassuupput, ilaatigut yogatoqarsinnaassaaq, ujaqqanik saarnginillu sanaluttoqarsinnaassalluni kiisalu qilaatersuneq uaajeernerlu misilinneqarsinnaassallutik. Immikkut meeqqanut sammisassaqartitsineq ingerlanneqassaaq, tassani meeqqat eqqumiitsuliornermik sammisassaqartinneqassallutik. Taakku saniatigut nipilersortartut tusarnaatitsineri amerlasuut ingerlanneqarumaarput, kalattuumiit nipilersukkanik nutaaliaanerusunik nipilersortartunut soorlu Small Time Giantsikkut tusarnaarneqarsinnaassallutik. Festivalimik aaqqissuisut Katuameersut billetsit akeqanngitsut aaneqarsinnaanngorneraniit akunnerup ataatsip iluani aaneqarlutik nungussimasut nalunaarutigaat.


Najuuttussanik killilersuineq

Ukioq manna festivalimi inuit najuussinnaasut Covid-19 ajornartoortitsinera peqqutigalugu killilersorneqarput. Namminersorlutik Oqartussat Katersuussinnaanermut Nalunaarutaanni allaqqavoq silami aaqqissuussani inuit amerlanerpaat 250-it najuussinnaasut. Taamanna aamma Qooqqut Festivalip ingerlanneqarnissaanut atuuppoq.

Qooqqut Festivali tallimanngornermi arfininngornermilu aggusutip ulluisa 14-ianni kiisalu 15-ianni ingerlanneqassaaq.


FAKTABOKS Tapiissuteqartarfik Sermeq pillugu

Kultureqarnermut immikkoortitat kulturikkut suliaqarnermi nutaanik misileraaffiusunik pilersitsinissamut kulturimillu suliaqartut assigiinngitsut, namminersorlutik inuussutissarsiortut kommunimilu innuttaasut akornanni suleqatigiinnermik siuarsaanermut atorneqassapput.

Aningaasaateqarfik Sermeq ukiumut marlunnik killeqartitsivoq: marsip aallaqqaataani aammalu oktobarip aallaqqaataani.

Tapiissuteqartarfik Sermeq pillugu paasisaqarnerorusukkuit una tooruk