Najukkami immikkut ilisimasallit inuussutissarsiornermik kivitsisuussapput

Kommuneqarfik Sermersuup, inuussutissarsiuteqartut Kommuneqarfik Sermersuullu akornanni suleqatigiinneq pitsaanerulersinneqarnissaa siunertaralugu, kommunimi assigiinngitsuni immikkoortuni Inuussutissarsiornermut Siunnersuisooqatigiit pilersippai.

Kommuneqarfik Sermersuup inuussutissarsiornermut inuussutissarsiortunullu atugassarititaasut siuarsarniarlugit Inuussutissarsiornermut Siunnersuisooqatigiit pingasut pilersippai - Nuummi Inuussutissarsiornermut Siunnersuisooqatigiit, Paamiuni Inuussutissarsiornermut Siunnersuisooqatigiit aamma Tunumi Inuussutissarsiornermut Siunnersuisooqatigiit. Kingullertut taaneqartoq Tasiilami inissisimavoq, tassanili Ittoqqortoormiiniit sinniisunik ilaasortaqarpoq.

”Inuussutissarsiornermut Siunnersuisooqatigiit maajip juunillu ingerlaneranni pilersinneqarnerat iluatsilluartoq nuannaarutigaara. Illoqarfigut sisamat assigiinngitsorujussuupput, taamaattumillu illoqarfinni inuussutissarsiuteqartut illoqarfimminni unammillernarsinnaasunik ilisimasaqartunik siunnersortinnissarput aqqutissiuunneqarnissarpullu pingaaruteqarluinnarpoq. Pisortat namminersortullu suleqatigiissinnaanerat pingaaruteqarput, tamatumunngalu najukkami inuussutissarsiornermut siunnersuisooqatigiit taperseeqataasinnaapput”, borgmesteri Charlotte Ludvigsen oqarpoq.

Inuussutissarsiornermut Siunnersuisooqatigiinni kommunalbestyrelsimi politikerinik, Kommuneqarfik Sermersuumi sulisunik kiisalu najukkami inuussutissarsiuteqartunik ilaasortaqarpoq. Matumani kommunimi politikerinut siunnersuisussanik inuussutissarsiornermut pingaaruteqarsinnaasunik qulequttanik oqaloqatigiittarfimmik pilersitsinissaq eqqarsaataavoq.

Tassunga atatillugu kommunimi inuussutissarsiortut siuariartornissamut ineriartornissamullu pitsaanerpaamik atugassaqarnissaannut qulakkeerinninnissaq siunertaavoq. Ilaatigut kommunimut tamakkiisumik inuussutissarsiornermut pilersaarummut isummanik kiisalu inuussutissarsiornerup ineriartortinneqarnissaanut siuarsaataasinnaasunik suliniutinik aalajangersimasunik siunnersuutinik siunnersuisooqatigiit tunniussisarneratigut.