Pisortaqatigiit Paamiuniillutillu Tasiilamiissapput

Ulloq 22. aamma 23. juuli oqarasuaat aamma maili atorlugit ulluinnarni attaveqartarnissamut pisariaqartut atornagit naapeqatigiittoqalerpat pisortaqatigiit tikeraarneranni Paamiuni Tasiilamilu kommunimi sulisut aaqqissuisuutinneqassapput.

Pisortaqatigiinneersut amerlanerpaat Paamiuniinnerisa nalaanni suleqat ataaseq aamma taamatut siunertaqarluni – tassa sulisunik naapitsiniarluni – Tasiilamiissaaq. Matumani pissutsit inissisimanerisa ersarissumik minnerunngitsumillu nutaartai eqqarsaatigalugit paasititsisoqarlunilu najukkani ilungersunarsinnaasut siumut saatsinnissaannut sulisut qanoq isumaqarnersut tusarliisoqarumaarluni.

”Sulisutta illoqarfimmi unamminartitaat pillugit sukkanerusumik ataatsimoorussaanerusumillu aalajangiiffiginissaannut periarfissaqaratta pisortaqatigiit tamarmiullutik Paamiuniipput”, kommunaldirektøri, Lars Møller-Sørensen, oqarpoq. 

Paamiuni ilaatigut qatserisarfiup, tigooraaviup aamma aqquserniortut pulaarneqarnissaat pilersaarutigineqarpoq. Aamma Atuarfik Tuiisaq, Meeqqerivik Miki, Meeraaqqerivik Meeraq, Klubbi Kalaaleq kiisalu Utoqqaat Illuat aamma Ilaqutariinnut Sullissivik pulaarneqassapputtaaq.

Nuummut angerlannginnermi Paamiut Timersortarfiat katersugaasiviallu pulaarneqassapput.