Kommuneqarfik Sermersooq kiffartuusseriaatsimik nutaamik atuinissaminut piareerpoq, taanna iluaqutsiullugu Nuummi Innuttaasunik Kiffartuussivimmi sullinneqarnissamut utaqqisartut amerlasaqisut ikilisinneqariaannaapput
Juulip naalernerani aggustillu aallartisimalernerani Nuummi Innuttaasunik Kiffartuussivik ulapaarfiusaqaaq. Ulluni taakkunani saniatigooralugu piniartut 2000-it aamma 3000-it akornanni amerlassuseqartut piniagassaminnut akuersissutinik pissarsiniartarput. Tamanna pissutigalugu innuttaasut tunuleriaallutik sivisuumik utaqqisariaqartarput. Ukioq manna taamanna allanngortariaqassaaq. Piniarnissamut akuersissutit sioqqutsilluni qarasaasiakkut inniminnerneqarsinnaanerat Kommuneqarfik Sermersuumi ammaanneqarpoq.
”Saniatigooralugu pinialuttartut taamaallaat nittartagaq aqqutigalugu akuersissutinik inniminniissapput. Ukioq manna piniarnissamut akuersissutit Namminersorlutik Oqartussaniit pissarsiarigutsigit, immersussavavut aaneqariaannaanerallu innuttaasumut mailikkut nalunaarutigalugit, Lone Rosengreen Pedersen Kommuneqarfik Sermersuumi Innuttaasunik Kiffartuussivimmi aqutsisoq oqaluttuarpoq.
Maannangaaq Kommuneqarfik Sermersuup nittartagaatigut akuersissutinik inniminniisoqarsinnaalereerpoq. Taamaaliorsinnaanermi naatsorsuutigineqassaaq namminersorlutik oqartussat akuersissutinik ingerlatseriaatsiminnik allanngortiterivallaarsimannginnissaat. Suut tamarmik naatsorsuutigisatut ippata kommunip akuersissutit namminersorlutik oqartussanit juulip qeqqani tigussavai.
”Piffissami sivikitsuararsuarmi tuttunniarnissamut umimmanniarnissamullu akuersissutinik agguaassisarnerup kingunerisaanik innuttaasut amerlasuut pitsaavallaanngitsumik sullinneqarnermik misigitittarsimavagut. Kiffartuussineq maanna pitsanngorsarparput, nuna tamakkerlugu qarasaasiakkut atortorissaarutip atulernissaata tungaanut”, Lone Rosengreen Pedersen oqarpoq.
Sioqqutsilluni inniminniinermut periarfissaq Nuummi kisimi atuutissaaq. Tassunga pissutaavoq illoqarfinni nunaqarfinnilu allaffinni allani qinnuteqartoqarnerani malinnaalluartoqartarmat.
Akuersissutit immikkoortortanut inniminnersinnaavatit ataani assimi takutinneqartoq naapertorlugu