Sinniisoqarfimmut pisortanngortussaq Tasiilami inuusuttunut: Atugarliornissamut sillimagitsi

Inuunermi nuannersunut, soorlu juullimut, feriamut, katittunut il.il., piffissaq annertooq atorlugu piareersartarpugut, kisiannili inuk kinaluunniit atugarliorani inuuneq ajorpoq, tamatumunngalu sillimareersinnaavugut, USA-mit sinniisoqarfimmut pisortanngortussaq Sung Choi, Tasiilami inuusuttut kulturikkut illorsuanni Igdlomi saqqummiinermi oqarpoq.

USA-p sinniisoqarfissaanut pisortanngortussap Sung Choip ikinngutini annaasimavaa, taanna ilinniarnerminni imminut toqussimagami. Aamma ikinngutai marluk innartorlutik ajunaarsimapput, tamatumalu saniatigut 11. septembari 2001-imi World Trade Centerimi sulisimavoq.

Allatut oqaatigalugu, nalunngilluinnarpaa inuuneq annernarsigaangat. Qanorli ingerlariaqqittoqartarpa?

”Inuusuttunut ersarissumik oqaatigaara, kisimiillutik atugarliornermik misigisaqarneq ajorputit, tamattali aqqusaartarparput. Piffissat oqimaassinnaasut qaangernissaannut ikinngutit, ilaquttat suleqatillu ikiuisinnaasut assut pingaaruteqartarput”.

Saqqummiinermi, toqqaannartumik oqalutseqartumi, inuusuttut 30-t sinnillit peqataapput.

Inuusuttut assut soqutiginnippasipput, neriuppungalu siunissami assingusunik aaqqissuussisinnaassallunga”, Sung Choi oqarpoq.