Tasiilami Najukkami Ataatsimiititaliap najukkami sanaluttartut tapersersorpai

’Sanalukkat Tasiilameersut – Handcrafted from Tasiilaq – Kunsthåndværk fra Tasiilaq’, Tasiilami Najukkami Ataatsimiititaliap najukkami sanaluttartunut poortuutissatut tunissutaasa saqqaanni taama allassimasoqarpoq. Poortuutissat atorlugit tikeraat sanalukkanik angerlaassinerminni Tasiilaq nunarsuarmut nittarsaassinnaavaat.

Sanaluttartut Tasiilarmiut suliaminnik tunisaqarunik, siunissami poortuutissat kusanartut Tasiilaq nunarsuarmut nittarsaassinnaavaat. Tassami najukkami sanaluttartut Tasiilami Najukkami Ataatsimiititaliamit poortuutissanik tunineqarsimapput, Tasiilamut tikeraat sanalukkanik angerlaassassaminnik pisineranni poortuutigisinnaasaannik.

Poortuutissat pappiliaapput qeratasuut, angissutsit pingasut assigiinngitsuullutik. Poortuutissani sanaluttarfiup-STUNK-ip ilisarnaataa, Anders Kilimemit suliaq takuneqarsinnaavoq. Poortuutissami allassimavoq sanalugaq Tasiilameersuusoq, taamaattumik pisisoq Thailandimeersuuppat, USA-meersuppat Qaanaameersuuppalluunniit, sanalugaq suminngaaneersuunersoq allat takusinnaavaat.

- Tasiilami sanaluttartuusut tulluusimaarutigaavut. Taakkua immikkuullarilluinnartunik suliaqartarput, taamaattumillu soorunami sanaluttagaasa saqqumilaartinnissaannut ikiuukkusuppugut. Tasiilaliarneq immini peqquteqartarpoq, Ole Jens Lundblad, Tasiilami Najukkami Ataatsimiititaliami ilaasortaq oqaluttuarpoq.

Tasiilami Najukkami Ataatsimiititaliaq poortuutissanik 1.500-nik najukkami sanaluttartunut tunissuteqarpoq. Tunniussinermit assit uani takukkit.