Borgmesteri: Innuttaasut Hans Egedep qanoq pineqarnissaa aalajangissavaat.

Innuttaasunik peqataatitsineq Nuummi Hans Egedep eqqaassutissaata qanoq pineqarnissaanik aalajangiisuusaaq.

Hans Egedep eqqaassutissaa Inuiattut ullorsiornitsinni qalipaammik kuineqarmalli qanoq pineqarnissaanik oqallinneqalerpoq.

”Eqqaassutissaq pillugu pingaaruteqaqisumik oqallittoqarpoq misigissutsillu illuatungeriinneersut sakkortoqaat. Pisumi innuttaasut peqatigalugit eqqaassutissap qanoq pineqarnissaanik oqallittoqarnissaa pissusissamisoorsoraara. Aalajangiinerpummi Nunatta oqaluttuarisaaneranut sunniuteqartussaavoq”, Charlotte Ludvigsen oqarpoq.

Innuttaasut inuit attaveqatigiittarfiisigut iliuuseqarasuartoqarnissaanik noqqaassuteqartut amerlapput, Sermersuumili borgmesterip innuttaasut kissaatigisaat naapertorlugit aalajangiisoqarnissaa pingaartippaa. 

”Hans Egedemut tunngatillugu isornartorsiornerit annertunerpaartarivaat, kalaallinut kristumiussuseq kitaamiullu inooriaasiat tunngavigalugu naqisimanninnera. Taamaattumik innuttaasut eqqaasutissaata qanoq pisoqarnissaanut peqataatinneqanngippata pissusissamisuungilluinnassaaq. Innuttaasut aalajangiisoqannginnerani tusaaniarneqarnerisa takutippaat taamani ukiut 98-it matuma siorna eqqaassutissap napparneqarneraniit inuiaqatigiittut qanoq siuariartigisimanersugut”, Charlotte Ludvigsen oqarpoq.

Eqqaassutissaq 1922-mi inuinnarniit katersiniartoqareernerisa kingorna napparneqarpoq. Nappaanersiorneqarnerani illoqarfiup innuttaasuinut tunniunneqarpoq. Eqqaassutissap akisussaaffigineqarnera 1953-ip tungaanut KGH-miippoq, tamassuma kingorna akisussaaffik Nuup Kommunianut tunniunneqarluni. 

Misigissutit eqqaassutissamut tunngasut assigiinngiiaarnerat borgmesterip paasilluarsinnaavaa. 

”Eqqaassutissaq pillugu inuit assigiinngitsunik isumaqarneri paasisinnaavara. Nunasiaataanerup nalaani timikkut tarnikkullu innarliinerit amerlaqaat, nunasianngortitsiniarnermilu siunertarineqartoq akuerisinnaanngilara. Aappaatigullu tamanna oqaluttuarisaanitta ilagaa ullumikkulu inuiaqatigiissutsitsinnut ilusilersueqataanikuulluni ” Charlotte Ludvigsen oqarpoq.

Innuttaasunik peqataatitsineq innuttaasunik ataatsimiititsinikkut kommunillu innuttaasunik peqataatitsisarfia ”Kommuneqafiga” aqqutigalugu ingerlanneqassaaq. Tamatuma saniatigut allakkatigut akissuteqarnissaq periarfissaassaaq. Suliaq piaarnerpaamik aallartisarneqassaaq qaammatillu marluk sivisussuseqarnissaa naatsorsuutigineqarpoq.