Borgmesteri Charlotte Ludvigsen kommunimiillu sulisut Kapisilinnut tikeraamata Illu sullivik inunnik ulikkaavippoq. Kapisilinni ilaatigut takornariaqarnermi inuussutissarsiornermilu periarfissat pillugit ineriartortitsinermut innuttaasunik peqataatitsinissaq anguniarlugu oqallilluni ataatsimiititsisoqarpoq. Aammattaaq Borgmesterip tikeraarneq nunaqarfimmi innuttaasunik naapeqateqarnissaanut periarfissiivoq.
Oqaloqatigiilluni ataatsimiittoqannginnerani nunaqarfik kaajallallugu pisuttuarfigineqarpoq. Borgmesterip Kapisilinni ilaatigut meeqqerivik, atuarfik, najukkami kommunip allaffia, ammerivik, savaaqqanik toqoraavittaaq umiatsiaaqqanillu iluarsaasarfik pulaarpai. Sumiiffinni tamani borgmesteri nunaqarfimmilu aqutsisoq Jakob Josefsen, nunaqarfimmi borgmesterimik angallassisoq, tikilluaqquneqarluarput.
– Kapisilinnukarneq tamatigut nuannertuaannarpoq. Kiinnat ilisarnartut takullugit, sulerusussuseqarneq tunniusimanerujussuarlu assut pissatsinnarpoq, borgmesteri Charlotte Ludvigsen pulaaqattaarnermini oqarpoq.
Nalunaaqutaq 15 nunaqarfimmi innuttaasut Illu sullivimmut oqaloqatiginnilluni ataatsimiinissamut qaaqqusaapput – tamannalu amerlasuunit tigulluarneqarpoq. Tassami illu inunnik ulikkaavillugu ataatsimiigiartoqarmat. Oqaloqatigiilluni ataatsimiinneq borgmesteri Charlotte Ludvigsenip tikilluaqqusineranik aallarnerneqarpoq. Kingorna kommunimiit pilersaarutit suut anguniarneqassanersut saqqummiunneqarput.
Pilersaarutit ilagaat World of Greenlandip piujuartitsineq tunngavigalugu soqutiginaqisunik illuaqqiornissaa. Tamaani illuaqqanik 50-inik kangerlummut Sermilimmut pitsaanerpaamik isikkivilimmik pilersitsisoqarniarpoq. Pilersaarut tikeraanit arlalinnit ornigarneqarluarlissaaq, najukkami aningaasanik kaaviiartitsilerluni ukiorlu kaajallallugu suliffissanik nutaanik 50-inik pilersitsissalluni.
Tassunga atatillugu Pinngortitamut Avatangiisinullu Naalakkersuisoqarfik Kapisillit kuuata eqqaanillu nunarsuarmi allami nassaasaanngitsunik immikkuullarissunik kapisileqarneranut eqqissisimatitsinissamut nalunaarutip suliarineranut killiffik pillugu paasissutissiivoq. Kommuneqarfik Sermersuumi Kommunalbestyrelsimit sumiiffiup eqqissisimatitanngornissaa assut pingaartinneqarpoq.
Angutimmarik Hansen Neriunami Arcticfarmimeersoq, Neriunap Kapisillillu akornatigut aqquteqalernissaanik kissaatiminik saqqummiivoq.
Pilersaarutit pillugit saqqummiussisoqareermat innuttaasut oqaaseqaateqarnissaminnut apersuinissaminnullu tunuarsimaanngillat.
– Kapisilinni tunniusimanerujussuaq assut nuannaarutigaara. Pilersaarutit aallartilaarneranni innuttaasunik peqataatitsinissaq uatsinnut assorsuaq pingaaruteqarpoq. Aalajangiussat ukua Kapisilinnut inuiaqatigiinnut assorsuaq sunniuteqartussaapput. Taamaattumik Kapisilinnut, nunaqarfittut orniginaqisumut, inuussutissarsiornissamut periarfissat ineriartorteqqinnissaannut soqutiginninnerujussuaq assut neriulluarnarpoq, borgmesteri Charlotte Ludvigsen nassuiaavoq.
Kapisilinnit assit matuma ataani takukkit.