Royal Run: 2020 taamaatinneqarpoq, taavalu 2021-mi ulloq aalajangerneqarpoq

Corona pissutigalugu Royal Run 2020 taamaatinneqarpoq. Peqatigitillugu 2021-mi Royal Run piinsip aappaani, maajip 24-anni ingerlanneqartussatut aalajangerneqarpoq, taavalu Nunatsinni maajip 17-ianni ingerlanneqassalluni.

Covid-19 pissutigalugu ukioq manna Royal Run siullermik aasap kingornagut pisussatut kinguartinneqaraluarpoq, maannali aqutsisoqatigiit isumaqatigiillutik aalajangerput Royal Run 2020 taamaatinneqassasoq.

- Suliassatta pingaarnersaraat peqataasussat isumannaatsuunissaasa peqqissusaasalu qulakkeerneqarnissaat, aammalu piviusorsiortumik oqassagutta isumaqarpugut inuit taamak amerlatigisut aasap qaangiunnerani katersuunnissaat illersorneqarsinnaanngitsoq. Tamanna ajuusaarnarpoq, tassami amerlasuujulluta arpaqatigiinnissarput neriuutigalugulu qilanaarisimagaluaratsigu, DIF-imi pisortaq Morten Mølholm Royal Run-imi aqutsisoqatigiit sinnerlugit oqarpoq.

Arpatsitsinermi aaqqissuussisuusumut Kim Godtfredsenimut aamma uggornartuuvoq, Royal Runertitsisoqarneranimi ataatsimoornissaq qilanaarisimagaluarpaa.

- Arpannissap taamaatinneqarnera soorunami uggornarpoq, inuunitsinnili piffissaq atugarput taamatut kinguneqartitsivoq. Ataatsimoornissaq sumiiffinnilu qanittumiit ungasissumiillu aggertut tikilluaqqunissaat qilanaarigaluarparput. Aappaagumulli qilanaalereerpugut, neriuppugullu arpannissaq iluatsilluarumaartoq!

Peqataaniarluni nalunaarnerit nuutinneqassapput

Royal Run 2021 illoqarfinni 2020-mi ingerlanneqarfissaraluini ingerlanneqassaaq, taavalu maannakkut 2020-mut Royal Run-imut peqataaniarlutik nalunaarsimasut 70.000-ingajaat ingerlaannaq 2021-mi peqataasussatut nuutinneqassapput. 2021-mi peqataasinnaasoqassanngikkuni, septembarip arfineq-pingajuata tungaanut akiliutigisimasat utertinneqarsinnaapput.

Royal Run 2021-mut peqataaniarluni nalunaarnissaq kingusinnerusukkut ammarneqassaaq.

Annertunerusumik paasisaqarusukkuit uunga attaveqasaatit www.royalrun.dk