Illoqarfiup immikkoortuata pilersinneqarnissaanut alloriarneq annertooq

Nuuk illoqarfittut annertunerujussuanngulerpoq. Kommuneqarfik Sermersuumi Kommunalbestyrelsip marlunngornermi immikkut ittumik ataatsimiinnermi Siorarsiorfiup tungaanut sullorsualiornissaq suliariumannittussarsiorneqarnissaa aalajangiuppaa.

”Kommunitsinni eqqortumik ingerlanissatsinnut alloriarneruvoq angisooq. Nuummi inissialiornissanut inuussutissarsiutillu sumiiffissaannut nunaminertat amigaatigineqarput. Siorarsiorfiup tungaanut sullorsualiornissaq suliffeqarfinnik amerlanerusunik inuillu amerlanerusut initaarnissaannik kinguneqassaaq”, Kommuneqarfik Sermersuumi borgmesteri, Charlotte Ludvigsen, taama oqarpoq.

Siorarsiorfimmut aqqusineq nutaaq 1.500 meterinik takissuseqassaaq, taakkununngalu ilaalluni sullorsuaq 1 kilometerinik takissuseqartoq. Biilinut aqqutit marluk immikkut 3,5 meterinik silissuseqassapput taavalu cykelertunut pisuinnarnullu aqqut 3,5 meterimik silissuseqassaaq. Pisuinnaat aqqutaat biilertullu aqqutaasa akornanni betonimik assersorneqarsimasuussaaq.

”Sullorsuup angallattunut tamanut toqqissisimanartuunissaa uannut pingaaruteqarpoq. Illoqarfiup immikkoortua nutaaq biileqanngitsunuttaaq najugaqarfigissallugu pitsaasuussaaq”, Charlotte Ludvigsen oqarpoq.

Sullorsuup sanaartorneqarnissaanut suliariumannittussarsiuussineq piaartumik aallartinneqassaaq, ukiullu pingasut qaangiuppata Siorarsiorfimmut angallassinnaalernissaq naatsorsuutigineqarpoq.

Siorarsiorfimmut aqquserniornissamut periarfissat assigiinngitsut misissorneqarnikuupput. Sullorsualiornissaq toqqarneqarpoq pissutigalugu missingersuusiat malillugit qaqqap sinaatigut aqquserniornissamut sanilliullugu 40 procentit missaanni akikinnerusussaammat.