Nuummiit Qinngutsinnut sullorsuaq aqqusaarlugu tassaavoq aqqut naannerpaaq, Sullorsuarli ataasiinnarmik sammiveqarluni aqqutigineqarsinnaasarnera pillugu kiisalu qulliup angallannermi najoqqutassap aappilasuunerani uninngarusunnatik amerlasuut Nuussuaq aqqusaartarpaat. Ukiualunnguit qaangiuppata tamanna qaangiussinnaavoq. Sullorsuaq allineratigut sanileriinni marlunni angallaffiusinnaasunngortinneqarsinnaavoq, taannalu Siorarsiorfiup tungaanut sullorsualiornissamik suliariumannittussarsiuussinermi ilanngunneqassaaq.
Nuuk ukiuni qulikkaani kingullerni inuttusiartorpoq, tamannalu aqqusinniornerni malinnaaffigineqanngitsoorsimavoq, sullorsuup silissisinneqarneratigut ullumikkut angallannermi ajornartorsiummut iluaqusiisinnaavoq.
”Sullorsuup silissisinneqarnera illoqarfimmut tamarmut iluaqutaassaaq. Angallannermi siuleriiaatilertarneq oqaluttuaannanngussaaq aamma Nuussuarmi angallannerujussuarmik annikillisaataassalluni kiisalu aqquserngit pisuinnarnut isumannaannerulerlutillu aqqutigiuminarnerulissapput. Taamaattumik periarfissap tamatuma suliariumannittussarsiuunneqarnissaanik kommunalbestyrelsip aalajangernera assut nuannaarutigaara”, Kommuneqarfik Sermersuumi borgmesteri Charlotte Ludvigsen oqarpoq.
Sullorsuarnik marlunnik suliaqarnissap ataatsimoortinneratigut kommune annertuumik sipaaruteqarnissaa naatsorsuutigineqarpoq, taamaaliornikkummi atortussat pisariaqartut Nuummut tikisinneqartussat ataatsikkut tikisinneqarsinnaassapput, soorlu aamma sulisut pisariaqartinneqartussat ataatsimooreersimassasut.