Angerlarsimaffeqanngitsut tuperni kiassakkani toqqissisimapput

Nuummiut angerlarsimaffeqanngitsut 26-t ualimut tupernut kiassakkanut, uffarfilinnut errorsisarfittalimmullu inissinneqarput. Nunaminertami annertujaami siammarnerunissaat siunertaralugu tassuunalu Covid-19-ip atuunnerani tunillanneqarsinnaanerannut illersorniarlugit taamaaliortoqarpoq, ”Tamaani inuit toqqissisimanerulersutut misiginerat nuannaarutigeqaara, borgmesteri Charlotte Ludvigsen oqarpoq, angerlarsimaffeqanngitsunut tupeqarfiliaq alakkartereerlugu.

Kommuneqarfik Sermersuup Covid-19-ip atuunnerata nalaani angerlarsimaffeqanngitsunut illersuinissaq pillugu pilersitaanut tallimanngornermi ualigaa, tupeqarfimmut inissittussat siulliit inissipput.

”Sila pissutigalugu kinguaattoortoqareersoq tupeqarfik maanna atorneqarsinnaalermat eqqissiallaqaanga. Angerlarsimaffeqanngitsunut toqqissiallaataanissaa illersorneqartutullu misiginissaat pingaarnerpaavoq, malugisinnaavaralu taamatut misigisut. Takkukkatta ilassiartorlugit illarpalaarnerat nuannaarnerallu malunnarpoq. Taakku sinnerlugit nuannaaqaanga”, Charlotte Ludvigsen takkuteqqammerluni tupeqarfimmi najugallit arlallit oqaloqatigereerlugit oqarpoq.

Piffissami assammissinnaanatalu eqitaarsinnaanngiffitsinni assigiinngitsutigut ilassiortoqarlunilu aalaterisoqarpoq, ilaatigut ”kamippatsinnik ilasseriaaseq” atorneqarluni, taamaaliornerlu soorunalimi illartitsinngitsuunngilaq.

Tupeqarfimmi tupernik suli nappaatiterineq ingerlavoq, tamakkerlutillu naammasseriarpata illoqarfimmi angerlarsimaffeqanngitsunut katillugit 80-inut inissaqassaaq.