Takornariaqarnermi najukkamiittut qitiutinneqassapput – tallimanngorneq Staycation pillugu webinarertoqarnerani peqataagit

Coronamik nalaataqarnitsinni Kalaallit Nunaanni takornarialerisut tamarmik imaannaanngitsumik aqqusaagaqarput. Kommuneqarfik Sermersuumi Sermersooq Businessip takornarialerinermik soqutiginnittut imaluunniit suliaqartut tamarmik takornariaqarneq pillugu workshoppertitsinissamut qaaqquai ilaatigullu sullinniakkanut nutaanut naleqqussarnissaq pineqassalluni: Najukkamiittut.

Coronamik nalaataqarnermi suliniutit pisariaqartut arlallit aallartinneqarput. Ulloq 20. marsimi Nunatsinniit aamma Nunatsinnut timmisartuussinerit umiarsuakkullu angallassinerit unitsinneqarput,  innuttaasut inuiaqatigiinni pisariaqavissunik atuuffillit kisiisa pinnagit. Takornarialerisut imaannaanngitsumik aqqusaagaqarput. Guide to Greenlandip Nunarput tamakkerlugu takornarialerisunik 80-inik amerlanerusunik tunuliaqutaqartup ilisimatitsinera naapertorlugu marsip qiteqqunneraniilli ataasinnguamilluunniit maannamut tunisaqarsimanngillat.

Angallassinerit unitsinneqarmata takornariat Nunatsinnut tikeraarsinnaanngillat, aammali arlaqarpugut ukioq manna Nunatsinni sulinngiffeqartariaqartut – Staycationimik imaluunniit najugaq qimannagu sulinngiffeqarnermik taallugu. Kisianniliuna Staycationitsialak qanoq isumagineqarsinnaava, aamma takornarialerisut neqeroorutitik najukkami najugaqartunut qanoq naleqqussarsinnaavaat?

Apeqqut taanna aqagu tallimanngorpat Staycation pillugu webinareqartitsisoqarnerani qitiusutut Kommuneqarfik Sermersuumit sammitinniarneqarpoq. Sermersooq Business Visit Greenland aamma Guide to Greenland suleqatigalugit aaqqissuisuuvoq, illillu qaaqqusaavutit. Workshoppertitsineq qallunaatut ingerlanneqassaaq takornariaqarnermillu soqutigisalinnut imaluunniit suliaqartunut tamanut ammatinneqarluni.

- Killiffipput siusinnerusukkut misiginngisaannarparput, taamaattumik allatut periuseqarnissaq pisariaqarpoq. Taamaattumik najukkami takornarialerisut niuernerminni sullitaasa allanngortinnissaannut ikiuukkusuppugut – tassaasut najukkami innuttaasut, Kommuneqarfik Sermersuumi inuussutissarsiornermut pisortaq Emil Skjervedal oqarpoq.

Staycation pillugu paasissutissat allat atuakkit uani.

 

Najukkami takornarialerisut atorneqarlik

Maannakkut killiffiup takornarialerisunit ilungersunartorsiutigineqarnera peqqutaalluni, niuernermi sullitanut tikeriaannarnut sangutitsinissaq pingaaruteqarpoq. Aammali takornarialerisut sunik neqerooruteqarnersut innuttaasunit takuneqarsinnaalernissaat taamatulli pingaaruteqartigaaq. Takornarianik kiffartuussineq Nunattalu pitsaanerpaartaanik takutitsineq ukiorpassuarni misilittagaqarfigineqarmat takornarialerisut Nunatsinnut tunngatillugu ilisimasaat immikkuullarilluinnarput.

- Arlaqarunarpugut ima eqqarsartartut Nunarput ilisimasaqarfigilluarpara. Aamma taamaalluarsinnaavoq, kisianni erlinnartuutinik ilisimarpianngisatsinnik takornarialerisoqarpugut ilisimannilluartunik. Taamaattumik Nunarput misigisassarpassuaqartarpoq aamma naak tamaani najugaqaraluaraanni, taamaattumik avatangiisivut iluarsiimippata aasamut takornarialerisortavut tamatta tapersersussagivut isumaqarpunga. Suliffeqarfinnut aamma uagutsinnut nuannersunik misigisaqarusuttunut iluaqutaassaaq, Emil Skjervedal oqarpoq.