Nukariinni inimi aqutsisoq: Pisariaqartinneqarnera naapertorlugu sulisarpunga

Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.

Marie R. Møller Nukariinni meeqqanut anginernut inimi aqutsisuuvoq. Perorsaasuunermi saniatigut isumaginninnermi ikiortitut ilinniarsimavoq, isumaginninnermullu tunngasunik pisariaqartitsisoqartillugu inuiaqatigiit pisariaqartilerpassuk piffissami aalajangersimasumi suliassat allat suliarinissaannut piareersimasarpoq.

”Assersuutigalugu utoqqarnik paaqqinniffimmi imaluunniit utoqqarnik sullissivimmi pisariaqartinneqassaguma ikiuunnissannut piareersimavunga” Marie R. Møller oqarpoq, piffissami aalajangersimasumi allanik suliaqarnissaminut piareersimavoq.

Taannami isumaqarpoq sapinngisatsinnik pitsaanerpaamik ikioqatigiinnissarput pingaaruteqartoq.  Aamma naak nalinginnaasumik suliffigisatsinniunngikkaluartoq.


Tamatta una aqqusaartussaavarput  

Angajoqqaat pisariaqavissumik sulisariaqartut meeraasa paarineqartariaqarnerini Marie R. Møller meeqqerivimmi maannakkut perorsaasutut sulivoq. Kisianni sungiusimasaannit pissutsit allaanerujussuupput.

”Soorunami meeqqat maannakkut ikinnerujussuupput. Maaniittut ininut assigiinngitsunut agguataarsimanissaat isumagisarparput, taamaalillutik inimi ataatsimik ataatsimoortut amerlavallaartinnaveersaarlugit”, nassuiaavoq.

Naak nammineq suleqatinilu killiffik pillugu annilaangamisaarsimagaluarlutik, eqqartornissaa eqqissisimanissarlu pikkoriffigisimavaat. Pingaartumik meeqqat eqqarsaatigalugit, tassami meeqqat toqqissisimanngitsuniitinneqassappata ajorami, Marie eqqissisimasumik nipeqarluni oqarpoq.