Ataasinngormat borgmesteri Charlotte Ludvigsen Facebookikkut toqqaannartumik malinnaatitsivoq. Kommunimi innuttaasut apeqqutaat tassani akiortorpai. Maanna meeqqat borgmesterimut apeqquteqarnissaminnut periarfissaqarput. Facebookikkut toqqaannartumik malinnaatitsissaaq sisamanngorneq nal. 12.15 tassanilu apeqqutit akissuteqarfigissallugit
Coronamik nalaataqarnermi apeqqutissarpassuaqalernartarpoq, aamma ataasinngormat innuttaasut apeqquteqarsinnaatinneqarnerini apererusuttorpassuupput borgmesterip akissuteqarfigisaanik. Malinnaatitsineq Kommuneqarfik Sermersuup Facebookikkut qupperneratigut ingerlanneqarpoq.
Piffissamilu nalaatatsinni inersimasut kisimik apeqqutissarpassuaqanngillat. Meeqqattaaq pisumit sunnerneqarnerminnit nalornissuteqarput. Imaassinnaavoq coronamik nalaataqarnermi misigissutsinut tunngasut iliuuseqarfigiuminaatsut pineqartut. Taamaattumik meeqqat apeqqutissaat borgmesterimit Charlotte Ludvigsenimit akissuteqarfigineqarnissaannut piareersimaffigineqarput.
– Pisuni ullumikkut atukkatsinni ernumassutigineqartut isumagissagivut pingaaruteqarluinnartuusoq isumaqarpunga. Innuttaasuttaaq nukarlerpaat ulluni makkunani toqqissisimanartumik misiginissaminnut aamma pisariaqartitsipput – tamannalu uanga qulakkeerusuppara, borgmesteri Charlotte Ludvigsen oqarpoq.
Charlotte Ludvigsenip meeqqat Kommuneqarfik Sermersuup Facebookikkut qupperneratigut sisamanngorneq nal. 12.15 oqaloqatigissavai
Annertunerusumik uani atuaruk