Inuiaqatigiinni pingaarutilimmik suliffeqarfiit aammalu sulisut taamatut atorfeqartut ajornartoornermi paarsititsinissaannut ilitsersuutitut tunngavissat.
Suliffeqarfinni namminersortuni pisortanilu sulisut arlallit inuiaqatigiinni pingaarutilinni taaneqartartuni atorfeqarput. Inuiaqatigiinni pingaarutilinnik kikkorpiaat sulisuunersut, inuiaqatigiinnilu pingaarutilinni sulisutut isigineqartariaqarneq pillugu, aammalu sulisut taakku meeraasa paarineqarnissaannut tunngatillugu kikkut aalajangiisarnersut kiisalu sulisunut taakkununnga meeqqanut paarsititsinermut piginnaatitaaffiit apeqqutigineqarnikuupput.
Nassuiaammi matumani apeqqutit sulisunut tamanut tamakkiisumik akineqanngillat, kisiannili tunngaviusumik najoqqutassiinerussalluni, nalornisoqartillugu ilitsersuutaasinnaasunik.
- ”Nunatta aningaasatigut unittuunnginnissaa” sapinngisamik attatiinnarneqassaaq. Imaappoq, pingaartumik suliffeqarfiit namminersortunit pigineqartut nalinginnaasumik ingerlatsinertik sapinngisamik attatiinnassavaat.
- Pisortat suliffeqarfii pingaarutillit ukununngali (killiligaanngitsumik) peqqinnissaqarfik, pilersuineq akissarsianik tunniussineq, attatiinnarneqassapput.
- Suliniutit naapertuuttuunissaat anguniarneqassaaq, taamaalilluta Coronamik nalaataqarneq anigorutsigu inuiaqatigiittut sapinngisamik piaartumik aallarteqqinnissarput qulakkeerniassagatsigu.
- Qanorluunniit meeqqeriviit atuarfiit allallu matuneqaraluarpata, kommunit meeqqat angajoqqaavi inuiaqatigiinni pingaarutilinni atorfeqartut ajornartoornermi paarsititsinissaannik neqerooruteqarput.
- Tamanna sulisoq inuiaqatigiinni pingaarutilimmik atorfeqarnersoq pillugu aqutsisumut tamakkiisumik aalajangiiffigisassanngortinneqarpoq. Taamaattumik sulisut ataasiakkat tamanna namminneq aalajangissanngilaat.
- Sulisut, inuiaqatigiinni pingaarutilinni atorfeqartutut (paasitinneqarsimasut), namminneq meeqqaminnik paarsinissartik pillugu suliffimminni najuutinngippata, suliffimmiit peqquteqarani sulinngitsoornertut isigineqassaaq, aningaasarsiaqaatigineqassananilu.
- Aappariinni, aappaasoq inuiaqatigiinni pingaarutilimmi atorfeqarpat, aappaalu pisortat suliffeqarfiutaannit angerlartitaasimasoq imaluunniit angerlarsimaffimmi suleqquneqarpat, taava aappaasup, suliffimminit angerlartitaasimasup meeqqat paarisariaqarpai.
Tunngavissatut saqqummiunneqartut maannakkut Nuummiinnaq atuupput. Aamma taakkua illoqarfinni allani, pisortat suliffeqarfiutaasa pisortatigoortumik matuneqarneranni, allannguuteqartoqarnerani atuutissapput.
Tamanna ataavartumik annertusiartortinneqassaaq.
Naalakkersuisut
Aningaasaqarnermut Naalakkersuisoqarfik
Departementet for Finanser