Coronamik nalaataqarnerup nalaani innuttaasut ikioqatigiipput

Ulluni arlaqanngitsumi Facebook gruppimi 6000-it sinnerlugit ilaasortaqalerpoq, coronamik nalaataqarnerup nalaani innuttaasut ikioqatigiinnissaat tassani siunertarineqarmat. Nammineq kajumissutsimik.

Corunavirusip siaruarnerata malitsigisaanik kikkut tamarmik ulluinnaat allanngorput, inuillu ilaannut ajornartorsiuterujussuupput. Taamaattumik Facebookimi gruppiliortoqarpoq atserlugu ”COVID19-imut illersorumallutik angerlarsimaannartut ikorfartoqatigiiffiat”, sukkaqalunilu ilaasortanik 6.000-init amerlanerusunik ilaasortaqalerpoq.

”Sukkangaarmat tupinnaannarporluunniit. Pisariaqarpat inuit piareersimasut, takutippaa”, Lars Karl Johannes Olsen, gruppimi aqutsisoq oqarpoq.


Pisariaqartitat assigiinngitsut, assigiinngitsunik ikiuineq

Gruppip siunertarivaa, inuit kajumissutsiminnik ikiuutissasut, aningaasartaqanngilarlu. Suliniutip pingaarnersaraa inuit inunnut allanut angerlarsimaffimminni mattussaaqqasunut allatulluunniit anisinnaanngitsunut pisiniussisut, aamma oqaloqatissamik nassaartoqarsinnaavoq.

”Aamma ilaqarput efterskolimiit angerlartunut ingerlaannarlu mattussaasussanut ininik nassaarnissamut ikiuisut” Lars Karl Johannes Olsen oqarpoq.

Aammattaaq nammineq piumassutsiminik angerlarsimaffimmi imminut mattuteqqavoq, ilisimatusarfimmiinnikuugami inuk alla coronavirusimik tunillanneqarsimasoq assigalugu. Taassumalu kingorna gruppe aqqutigalugu pisiniarnissamut ikiortissaminik nassaarnikuulluni.


Aqutsineq ajornakusoornartoq

Nittarsaassinissamut aningaasassaqanngimmat Facebooki oqaatsinik ingerlatsivigissallugu pitsaalluinnarpoq, Kalaallit Nunaanni atuisumut amerlammata.

Isumaqarportaaq, aqutsisut gruppip aqunnissaa ilaatigut ajornakusoortittaraat, qulequtarlu sammineqarnissaa - innuttaasut imminnut ikioqatigiissasut.