Coronap peruluutaanerani meeqqanut ajornartorsiortunut ikiuutissaq

Imaneq 20-mi matu paarnaaqqatinneqarpoq, pisoqariasaartoqarneranili suli ikiortissarsiortoqarsinnaalluni. Ikiortissarsiorniaruit qanoq iliussanersutit paasissutissaq, uaniippoq.

Nalaataqariasaassaguit ilisarisimassalluunniit nalaataqariasaassappat ikiortissarsiornissannut suli periarfissaavoq, Meeqqanut Ilaqutariinnullu Ingerlatsivimmi upalungaarsimasoqarpoq. Tassanngaannaq pisoqarnermi pineqarlutik nakuusertoqartillugu, kannguttaatsuliorfiginnittoqartillugu paarsinerluttoqartilluguluunniit meeqqap illersorneqarnissaa.  

Nuummi coronartoqarnerani pissutsit immikkuullarissuummata, Imaneq 20-mi matu paarnaaqqavoq, piffissamili nal. 8.00 – 16.00 akornanni sulisoqartassaaq. Ingerlatsivimmut attaveqarsinnaavutit, oqarasuaatikkut 36 60 60-imut sianerlutit imaluunniit mailerlutit meeqqavut@sermersooq.gl Nalunaarutiginnittarfimmili sillimasuusup ulluinnarni nalunaarutiginninniartunik sullissineq isumagisassavaa. Saaffiginninnerit nalinginnaasut pillugit saaffiginniffissaq sepi@sermersooq.gl

”Tassanngaannaq pisoqarsinnaavoq, aamma kommunip corona pillugu maannakkut tatineqarnerata nalaani. Taamaammat pingaaruteqarpoq, ulapinnitsinni meeqqat ilaqutariillu atugarliortut ikiorneqarnissamik pisariaqartitsisut puigunnginnissaat.” Meeqqanut Ilaqutariinnullu Ingerlatsivimmi pisortaq Martha Lund Olsen oqarpoq.


Nuup matoqqanerata nalaani suliniutit nutaat

Ajuusaarnaraluartumik inuit amerlasuut ataatsimoorsinnaajunnaarmata malitassat arlalissuit malinneqartariaqarput. Tamanna pillugu Meeqqanut Ilaqutariinnullu Ingerlatsivik arlalinnik suliniuteqarluni aallartippoq, taamaalilluni meeqqat inuuniarnikkut ajornartorsiortut ikiorneqartuaannarsinnaanerat anguniarlugu. Ilaatigut Meeqqanut Ilaqutariinnullu Sullissivik maannakkut, isumaqatigiissuteqarneq malillugu ilaqutariinnut ajornartorsiortunut ullormut sianerlutik qanoq innersut paasiniaasalerput.

”Ajoraluartumik kommunitsinni meerarpassuit ilaqutariippassuillu imaannanngitsumik atugaqarput, taamaattumik nuannaarutigisorujussuuara piffissami sakkortuumi atugaqarnerup nalaani aamma taakku ikiorniarlugit aaqqiissuteqarsinnaagatta. Qanorluunniit pisoqaraluarpat, meerartavut ajornartorsiortut pingaarnerpaatittuaannassavavut”, Kommuneqarfik Sermersuumi borgmesteri Charlotte Ludvigsen oqarpoq.

Aammattaaq qimarnguimmi inuit amerlasuut katersuussinnaanngillat, tassanngaannarlu pisoqarneratigut meeqqat arnallu takkuttut inissaarunneqaraluarpata unnuiffissanik allatigut periarfissarsiuunneqassapput.

Inuusuttunik siunnersuisartut aamma suliniuteqareernermi malitseqartitsisut inuusuttunik ernumanarnerpaatut inissisimasunik pulaagaqartassapput aamma nalunaarutiginnittoqarsimatillugu pinartumik iliuuserisariaqakkat ilanngullugit. Taamaanngippat inuusuttunik attaveqarneq oqarasuaatikkut pisassaaq – tamatumani aamma BFC-mit isumagineqassalluni. Sianernerup saniatigut ernumanartoqarsimatillugu angerlarsimaffimmut ornigunneq pisarpoq.