Qeqertarsuatsiaani innuttaasut utoqqaat nutaamik ornittagaqalerput, najortigiinneq ataatsimoornerlu qitiutinneqarlutik.
Suliffeqarnermut Isumaginninnermullu Ataatsimiititami siulittaasumit Inge Olsvig Brandtimit Qeqertarsuatsiaani utoqqalinersialinnut siusinaartumillu pensionisialinnut ornittagaq nutaaq ammaanersiorneqarmat sofami issiavinnilu issiasut qungujulaqaat. Naak illu utoqqarnut atugassiaagaluartoq innuttaasut tamarmik qassinilluunniit ukiullit ammaanersiornermut takkupput, kaffi kaagillu sassaalliutigineqarput, nunaqqarfimmilu meeqqanut lemonade mamakujuillu sassaalliutigineqarlutik.
Siulittaasoq ammaanersiornermi oqalugiarnermini inuttut naleqartitanik pingaartitseqisoq iluarinnippaseqaaq.
”Assut neriuutigaara, utoqqaat illutaartik atorluassagaat. Qanorluunniit ukioqaraluarutta ukioqatitta naapinnissaat pisariaqartittarparput. Utoqqalinermi isumaqanngilaq inuuneq unissasoq imaanngilarlu pisariaqartitsineq annikillissasoq. Inuttut ataatsimoornissamik pisariaqartitsiuaannarpugut. Allanut pingaaruteqartumik sunneeqataasinnaaneq inuuniarnikkut atugassarititaasunut ilaavoq inuunittalu isumaqalernissaanut pingaaruteqarluni”, ilaatigut Inge Olsvig Brandt oqarpoq.
Qeqertarsuatsiaani utoqqaat ornittagaqalernissaannut isumassarsiaq nunaqarfimmi aqutsisunut siulittaasuusimasumit Jonathan Jacobsenimit november 2018-imi saqqummiunneqarpoq, ukiorlu ataaseq affarlu qaangiutinngitsut siunnersuut piviusunngorpoq.
Massakkut Qeqertarsuatsiaani utoqqalinersiallit siusinaartumillu pensionisiallillu 30-nit amerlanerupput, taamaattumik qularnanngilaq illumik atuisussat amerlasuujussasut, ullut tamaasa 08.00-16.00 ammasassaaq.