Nuummi isumannaallisaanermut upalungaarsimaneq ima isikkoqarpoq

Soorlu ilisimatitsissutigineqareersut malillugit Nuummi pisortat allaffeqarfii Covid-19-ip tunillaassuunneranik killiliiniarlutik isumannaallisaanermut upalungaarsimalerput.

Nuummi allaffeqarfinni sulisut periarfissallit tamarmik angerlartinneqaraluarlutik suliassatik isumagisussaavaat. Sulisut angerlartinneqarsimasut amerlanerpaat oqarasuaatikkut e-mailikkulluunniit suli saaffigineqarsinnaapput. Sianertunik nuutsitsisarfik suli ammassaaq.

Atuarfeqarfiit meeqqeriviillu aqagu ullaaralaakkut isumannaallisaanermut upalungaarsimalissapput. Tassa imaappoq, inuit ingerlatsinermut pisariaqavissumik atorfillit meerartaminnik meeqqerivinnukaassinissaminnik periarfissaqassasut. 

Covid-19-ip tunillaassornera annikillisarniarlugu Kommuneqarfik Sermersooq ingerlatsinermi assigiinngitsorpassuarnik allannguivoq.

Innuttaasunik Kiffartuussivimmi oqarasuaatikkut e-mailikkullunniit siumoortumik inniminneereernikkut aggerluni kiffartuuneqarnissaq periarfissaavoq. Aamma taamatorpiaq ippoq Majoriami suliffissarsiortutut allatsinniaraanni.

Isumaginninnermi Sullissivimmi aggerluni saaffiginnittoqarsinnaavoq, innuttaasulli killilersorlugit isertinneqassapput innuttaasuttaaq tamarmik oqarasuaatikkut saaffiginninnissaat kaammattuutigineqarpoq.

Siusinnerusukkut kommuneqarfiup nittartagaatigut allaffeqarfiit taakkua tamanut matoqqanerarneqarsimapput.  Tamanna kukkuneruvoq.