Atuarfiit matugallarneqassapput

Kommuneqarfik Sermersuumi atuarfiit ulloq 23. marsi matugallarneqassapput. Angajoqqaanut inuiaqatigiinni pingaarutilimmik inissisisimasunut ajornartoornermi paaqqinniffiusinnaasunik Kommuneqarfik Sermersooq pilersitsivoq.

Naalakkersuisunit Nunatsinni atuarfiit matugallarneqarnissaat aalajangerneqarpoq. Tamanna Nunatsinni angajoqqaat atuartuutillit akornanni ernumaleraluttuinnarneq tunngavigalugu aalajangerneqarpoq. Kommuneqarfik Sermersuumi atuarfinnut isumannaallisaanermut upalungaarsimanissaq atortussanngortinneqarpoq.

Atuarfeqarnermut tunngasuni iliuuseqarneq

Atuarfeqarnermut tunngasuni ungasianiit ilinniartitsineq, sapinngisaq malillugu atorneqassaaq. Atuarfinni sulisut ilinniartitsineq piareersarnerlu atuarfimmiit imaluunniit angerlarsimaffimmiit ilinniartitsinermut iserfissat aqqutigalugit ingerlatsissapput. Atuartunut interneteqanngitsunut ilinniartitsissusiortoqassaaq, atuarfimmi ilinniartitsisup isumaqatigereerneratigut aaneqarsinnaasunik.

Aamma ajornartoornermi paaqqinniffissanik aaqqissuussineq pilersinneqassaaq. Ajornartoornermi atuarfinni paaqqinninneq atuartunut 1. klassiniit 7. klasse ilanngullugu ammasarfinni nalinginnaasuni pisassaaq 08:00 – 16:00.

Meeqqat inuiaqatigiinni pingaarutilimmik inissisimasunik angajoqqaallit, paaqqinniffissamillu allamik periarfissaqanngitsut, ajornartoornermi paaqqinninnermut aaqqissuussinermut meeqqatik allatsissinnaavaat. Inuiaqatigiinni pingaarutilimmik inissisimanerup nalilerneqarneranik akisussaaffik angajoqqaaniippoq. Tamanna aamma fritidshjemminut atuuppoq, taakkulu ajornartoornermi paaqqinninneq pillugu aamma attavigineqarsinnaapput.

Angajoqqaat ajornartoornermi paaqqinniffissamik pisariaqartitsisut paaqqinnittarfittut neqeroorutigineqareersut saaffigissavaat.

Ulluunerani paaqqinittarfiit ammaannassapput.