Kalaallit Nunaanni kommunit atuarfiit ammatippaat

Pisut qanimut malinnaaffigineqarnerini Nunatsinni kommunini atuarfiit meeqqeriviillu ammassapput. Meeqqat atuartut arlallit ataatsimoortinnissaat pinngitsoortinniarlugu malittarisassiortoqareerpoq.

Nunatsinni kommunini borgmesterit tamarmik, nappaassuaq COVID-19 Kalaallit Nunaannut anngutissagaluarpat tuniluunnaveersaartitsinermi sallersaaniarlutik isumaqatigiissutigaat.

Nunatsinni kommunit ataatsimut eqqartueqatigiinnermi atuarfiit meeqqeriviillu matuniarnagit aalajangerpaat. Taamaattumik allatut aalajangiisoqarnissaanut ammaannassapput. Pisutsilli Nunatsinni kommuninit qanimut malinnaaffigineqassapput. Kommunit tuniluunnaveersaartitsinissaq pillugu kiisalu COVID-19-imik tunillanneqarsimasunik paasisaqartoqassagaluarpat upalungaarsimanissamut iliuusissanik pilersitsereerput.

Kalaallit Nunaanni COVID-19-imik tunillatsinneqarsimasunik suli paasisaqartoqanngitsoq maanna matusinissaq annertuumik meeqqat angajoqqaavinut kinguneqarsinnaavoq, angajoqqaat meeqqaminnut paarsisussarsiornissaminnut allanik periarfissarsiortariaqalissammata ilaatigullu suliffeqarfinnit pingaaruteqartunit sulinngikkallartariaqarlutik, soorlu peqqinnissaqarfimmi, utoqqaat illuini paaqqutarinnittarfinnilu il.il.

Atuarfiit meeqqeriviillu matuneqarnissaat isumannaannerusutut illersorneqarsinnaanerusutullu nalilerneqarpata erngerluni iliuuseqartoqassaaq.

- Iliuuserineqartut tamarmik atuutilersinneqarput innuttaasut sulisullu isumannaatsuunissaat peqqissusaallu qulakkeerniarlugu, Nunatsinni borgmesterit nalunaarput.

Nunatsinni kommunit atuuffinnut pingaarutilinnut arlalinnut akisussaaffeqarput, virusi Nunatsinni siaruaatissagaluarpat pinngitsooratik atuuttariaqartunik. Taamaattumik pingaaruteqarpoq, sapinngisamik tuniluunnaveersaartitsisoqarnissaa, taamaalillutik kommunit innuttaasunut qanimut suliassaminnik pingaarnerusunik ingerlatsiinnarniassammata, ilaatigut inuiaqatigiinni sanngiinnerusunik ikorfartuinermi - assersuutigalugu utoqqartatsinnik.

Danmarkimi pissutsit sapaatip-akunnerata matuma ingerlanerani ajorseriarput, kisianni nappaassuaq COVID-19 suli Nunatsinnut anngutinngilaq. Nunatsinnili pissutsit suli Danmarkimisulli ilinngillat. Taamaakkaluartorli pisut Nunatsinni borgmesterinit soqutaanngitsutut isigineqanngillat.

- Pisoq ilungersunarluinnartutut isigaarput, periusissiarpullu allanngortinneqassanersoq nalilersortuarlugu. Innuttaasut napparsimalernissamut illersorniarlugit iliuusissat peqqussutillu atuupput, Kommuneqarfik Sermersuumi borgmesteri Charlotte Ludvigsen Nunatsinni kommunini borgmesterit sinnerlugit oqarpoq.

”Kommunit tamarmik COVID-19 pillugu upalungaarsimanissamut tunngasut qanimut suleqatigiissutigaat aammalu Tunillaassortunik nappaalasoqarneranut Ataatsimiititaliarsuaq ataavartumik oqaloqatigisarlugu. Pisut qanimut malinnaavigineqarput, pisumilu matumani eqqissisimallutalu akisussaassuseqartariaqarpugut”, borgmesteri Kiista P. Isaksen Nunatsinni kommunini borgmesterit sinnerlugit naggasiivoq.