Kommunimut Co2-mik aniatitsiffiunngitsumut alloriarneq pingaarutilik

Kommuneqarfik Sermersuumi nukissiuuteqarnermut silaannaallu pissusiinut mingutsitsiffiunngitsumik suliniutit pillugit Kommuneqarfik Sermersooq soqutiginnittunut tamanut ataasinngorneq februaarip pingajuanni Illumik Ammatitsivoq.

ESANI a/s Kalaallit Nunaat tamakkerlugu eqqagassalerinermut piginneqatigiiffiuvoq, taassumalu suliassarai Nuummi Sisimiunilu ikuallaaviliornissat. Ikuallaavinni isumagineqassapput, illoqarfinnit nunaqarfinniillu eqqagassat tamarmik tigoorarneqarnissaat ikuallanneqartarnissaallu.

Kommuneqarfik Sermersuumi kommunalbestyrelsip suliniutissatut aalajangiussaasa ilaat tassaavoq "kommunip avatangiisinut silaannaallu pissusiinut suliniutit, atoqqiinerit, eqqaaveqarnermilu suliniutit ataatsimut nukittorsarnissaat", taamaattumik suliassaqarfimmi periusissiassap akuersissutigineqarnissaa siunertaralugu periarfissat assigiinngitsut misissuiffigeqqissaassallugit Kommuneqarfik Sermersuumit soqutigineqarpoq.

Periusissiassat ilaat malillugit Co2-p sapinngisamik appasinnerpaamiitinnissaa anguniassallugu. Ikuallaaviit nutaat Co2-mik annikillisaasinnaasunut atatillugu nutaamik pilersaarusiornissaq imminut akilersinnaanersoq paasiniarlugu suleqatigineqartup Rambøllip misissuineq aallartippaa. Eqqakkanik ikuallaanermi Co2-p pilersinneqartup ilaa e-fuel-itut atoqqinneqarsinnaavoq, taamaalilluni Kalaallit Nunaata imminut pilersulernissaanut alloriarneq pingaaruteqartuulluni, imaluunniit nunarsuatta sinneranut tuniniarneqarsinnaalluni.

Tamakkuli tamarmik suli takorluugaannaapput, pilersaarut aatsaat aallartilaartuulluni. Ilaatigut Avatangiisinut pisortap Frank Rasmussenip nassuiaanera malillugu, kommunimi avatangiisinut tunngatillugu suliniutigineqartut ilaat tassaasoq ikuallaavimmiit pujoq aniatinneqartoq minguitsunngortinneqassasoq.