Issittup qullii – ukiup taarnerani qullernik eqqumiitsuliorneq

Qaamaneq qalipaatillu misigissutsinik pilersitsisarpoq, ukiullu qaammataani taarnerpaani Frederik Kunngi Kristensenip aamma Naleraq Eugeniusip qullernik eqqumiitsuliorluni saqqummersitsinerat “Issittup qullii” Nuummi Eqqumiitsulianik Saqqummersitsivimmit qilanaarineqarpoq. Arfininngornermi novembarip arfineq aappaani nal. 15 ammaanersiorneq pissaaq, ilaatigullu Aqqaluk Lynge oqalugiassaaq.


Saqqummersitsinerup qulequtaa, Issittup qullii, marloqiimmik isumaqarnera Kunngip oqaatsinik pinnguallaqqinneranit pilersinneqarpoq. Ukiukkut issinnerani qullernik qaamanernillu assigiinngitsunit misigisartakkatsinnut tunngavoq, aammali ukiukkut anorimit isigut naapinneqaaraangata qullililertarnitsinnut tunngalluni.


Naleraq Eugenius qullernik eqqumiitsuliornermik suliaqartarpoq, Japanimilu qullernik digitalimillu eqqumiitsuliornermik isumassarsiortarluni. ”Qullilerissagaagama ini maluginiaqqaartarpara, periarfissanik assigiinngitsunik ujaasillunga. Saqqummersitsinermut uunga qulliit arriitsunnguamik allanngorartissallugit suliaraakka, allanngorneri malunnanngitsunngorlugit. Uannut aamma pingaaruteqarpoq qalipaatit akulerunneqarpallaannginnissaat, taamaammat qalipaatit allanngorarneri qajassuartumik tulleriissaarnilersorpakka”, Naleraq qullilersornini pillugu taama oqarpoq. Eqqumiitsuliat qullilersornerlu ataatsimoorlutik silarsuaaqqamik qalipaatinik qullernillu imalimmik pilersitsivoq. Eqqumiitsuliat qullernit allanngorarneqaannaavissut nutaanik takusassaqartuartitsipput.


Saqqummersitsineq ukiup ataatsip missaata ingerlarngani suliarineqarsimavoq. Saqqummersitsinermi Kunngip qalipagai qulingiluat, qaamanermut malussarittunik qalipaatinik qalipanneqarsimasut takuneqarsinnaassapput. Kunngi KIMIK-imi 2017-imili ataqqinaatitut ilaasortanngorpoq, taalliani atuaganngorlugit arlaleriarluni saqqummersitsinikuuvoq, aammalu nuuteeqqat sisamassaat saqqummerseqqammillugu. Saqqummersitsinermi Naleraq Eugeniusip qullernik eqqumiitsuliornera misigineqarsinnaassaaq, Kunngip qalipagaalu sunniiveqatigiinnermik pilersitsisut, ataanilu nunamik assilisamik angisuumik seqersitsineq misigineqarsinnaalluni. Naleraq siornatigut Sisimiuni Taseralimmi qullernik eqqumiitsuliorluni saqqummersitsinikuuvoq, siornalu aamma decembarimi Luminous Greenland saqqummersillugu. Luminous Greenland silami Ukkusissami (Store Malenemi) qullernik eqqumiitsuliornermik angingaatsiartumik saqqummersitsineruvoq, tamatumalu kingorna saqqummersitsineq Kalaallit Nunaanni angalaarluni.


Saqqummersitsineq Namminersorlutik Oqartussat Kulturimut aningaasaliissutaannit aningaasaliiffigineqarpoq. Saqqummersitsineq novembarip arfineq aappaani ammaanersiorneqassaaq, januaarillu 24-ata tungaanut misigineqarsinnaassalluni.