Innuttaasunut

Kommune sanaartornermi sulianik pilertornerusumik ingerlatserusuppoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

2021-mut missingersuutissanut isumaqatigiinniarnermi sanaartornermi sulianik pilertornerusumik ingerlatsinissamut atugassanik arlalinnik nassiussisoqarpoq. Kommunip siuariartornissamut pilersaarutaanut angummanniarluni sulianik ingerlatsisarnerup agguaqatigiissillugu sapaatit akunnerinut pingasunut sisamanulluunniit annikillisinneqarnissaa anguniagaavoq. Qinnuteqartuttaaq sulianik ingerlatsinermut pilertornerusumut qulakkeerinneqataasinnaapput.

Kommuneqarfik Sermersooq piffissami matumani annertuumik sanaartorfiuvoq. Tamanna kranit amerlasuut annermik Nuummi takussaasut ersersippaat, aammattaarli malittarisassat malinneqarnissaannik qulakkeerisunit tamanna maluginiarneqarpoq.

”Innuttaasut inissianik amerlanerusunik pissarsiniunnissaat aningaasaqarnerullu ineriartortinnissaa sorpassuartigut unammissutigaarput. Taamaattumik sanaartornermi sulianik pilertornerusumik ingerlatsinissaq annertunerujussuarmik sulissutigilerparput”, borgmester Charlotte Ludvigsen oqarpoq

Sulisut taakku Sanarfinermut Avatangiisinullu Ingerlatsivimmiipput, ulapippullu. Immaqa ulapippallaalaarput. Tamanna politikerit paasivaat, taamaattumik 2021-mut missingersuutissanut isumaqatigiinniarnermi sanaartornermi sulianik ingerlatsinerup pitsaanerulernissaanut 4,9 mil. koruuninik immikkoortitsipput.

Amerlanerit usinik nusutseqataassapput

“Sanaartornermi sulianik ingerlatsineq pitsaanerulersinniarlugu sulianillu ingerlatsisarnerup agguaqatigiissillugu sapaatit akunnerinut pingasunut sisamanulluunniit annikillisinneqarnissaa anguniarlugu tallimanik arfinilinnilluunniit nutaanik sulisutaarnissarput neriuutigaarput”, pilersaarusiornermut pisortaagallartoq Runa Sværd, tamanna ilutigalugu qinnuteqartunut siunnersuuteqaatigaluni oqarpoq.

”Qinnuteqaatissi malitassarisanut aallaqqaataanit naapertuunnissaat isumagisiuk taamaalilluta uteqattaartumik attaveqaqatigiinnikkut  kinguaattooruteqarnissaraluaq pinngitsoortissavarput. Siusinaarlusittaaq qinnuteqarisi, taamaalilluta pilersaarusiorluarnerusinnaassagatta. Marsimi silaannaq sanaartornissamut tulluarneruleraangat qinnuteqaaterpassuit takkussuuttartut ilaatigut misigisarparput. Maskiinalli atorneqannginnerini pappiaqqatigut suliassat piareertareernissaat iluaqutaangaatsiassaaq”, Runa Sværd oqarpoq.