Uuliakoq inuiaqatigiit annertuumik iluanaarutaasinnaavoq

Kommuneqarfik Sermersuumit Eqqakkanik Tigooraavik uuliakumik eqqortumik passussinissaq qulakkeerniarlugu innuttaasut suliffeqarfiillu oqaloqatigineqarusupput. Eqqunngitsumik eqqortumillu passussinerup assigiinngissutaa tassaavoq aningaasaqarnikkut avatangiisinullu mingutsitsinermiit isumalluutitut atorneqarsinnaanera.

”Inuiaqatigiinni suliffissuaqarfiusumi uuliakoqartarnera pinngitsoorneqarsinnaanngilaq, taamaattumik inuiaqatigiit ataatsimut isigalugit pitsaanerpaamik suliarineqartarnissaa pingaaruteqarluinnarpoq. Eqqortumik passunneqarneratigut uuliakoq isumalluutinngortinneqarsinnaavoq. Akerlianillu eqqunngitsumik passussineq avatangiisinut innuttaasunullu annertuumik artukkiisinnaavoq,” Frank Rasmussen, Kommuneqarfik Sermersuumi avatangiisinut pisortaq oqarpoq.

Tamanna pillugu uuliakoq pillugu periusissiami immikkoortoq nutaaq, assigiinngitsunik suliniutissanik imalik, Kommuneqarfik Sermersuumi Eqqakkanik Tigooraaviup aallartippaa. Ilaatigut suliffeqarfiit suliaqartullu attuumassuteqartut uuliakumik passussisarnerat pillugu sukumiinerusumik oqaloqatigineqartalissapput. Taamatuttaaq Eqqakkanik Tigooraavimmit aalisartunut, piniartunut umiatsiaatilinnullu katersuiviit inissinneqarsimasut nakkutigineqarnerulissapput, taamaalillunilu atuisut aaqqiissummik eqqortumik atorluaanerulerniassammata taamalu illersorneqarsinnaasumik avatangiisinullu mingutsitsinani uuliakut iginneqarsinnaanngorlutik.

Tamatuma saniatigut Eqqakkanik Tigooraavimmit ullumikkut Nuummi suliaqartartut uuliakumik ikuallaasartut misissuiffigineqassapput. Tassunga atatillugu suliaqartartut atortorissaarutiminnik avatangiisinik mingutsitsinnginnissaq pillugu akuersissutilimmik ikuallaanerminnut atatillugu annertussutsimut pitsaassutsimullu akuerineqarsimasut ikuallanneqartarnerat qulakkeerneqarnissaa pingaaruteqarpoq. ”Aqunneqanngitsumik uuliakumik ikuallaaneq avatangiisinut mingutsitsinermik kinguneqartartoq nalunngilarput, assersuutigalugu dioxininik aamma aatsitassanik oqimaatsunik aniatitsineq ajoraluartumik nerisassatsinnut sukkasuumik akuliusinnaapput allatulluunniit nerisaqaqatigiinni amerliartuinnarsinnaallutik”.


Nillusaat assut akornutaasarpoq

Nillusaatip uuliakumit avissaarteqqanissaanut annikitsumik allannguutaagaluarluni annertuumik iluaqutaassaaq. Uuliakoq nillusaateqarpat iginneqarnissaa ajornakusoornerulissaaq avatangiisinullu akornutaanerulluni.

Tamanna pillugu Eqqakkanik Tigooraavimmit ineriartorneq ajunngitsumik ingerlanissaa pillugu oqaloqatigiittarneq pitsaanerulersinniarlugu kiisalu inuiaqatigiit iluanaaruteqarnissaat pillugu paaseqatigiinnissaq annertusarniarlugu suliffeqarfiit assigiinngitsut pulaarneqassapput.

”Isumalluutip atorluarneqanngitsup atorluarneqarnissaanut periarfissap piviusunngortinnissaa qilanaaraarput. Tassunga atatillugu suleqatigiinnissarput pisariaqarpoq, iluatsissappallu kikkut tamarmik pissarsiaqaatigissavaat”, Frank Rasmussen oqarpoq.