Immitsinnut paarisa

Saqqarmioq immitsinnut 1-2 meterit miss. ungasitsiginissatsinnut qulakkeerinneqataassaaq.

Immitsinnut paarinissatsinnut tamatta akisussaaqataavugut. Pingaartumik piffissami tunillatsinnaveersaarnermi allanut ungasinniartariaqarnissamik immitsinnut eqqaasittarnitsinni.

Kommuneqarfik Sermersooq tassunga atatillugu saqqarmiuliortitsivoq, taanna eqqiluisaarnerunissamik ersarinnerusunngortitsinissamik qulakkeerinneqataatissallugu - peqatigitillugulu oqartussat immitsinnut qanillivallaannginnissamik innersuussutaannik eqqaasitsisuussalluni.

Carsten Jensen Kommuneqarfik Sermersuumi eqqiluisaarnermut il.il. tunngasumik periusissaliornermik ukioq manna suliaqartuuvoq , tassani peqataallutik Eqqiluisaarnissamut suleqatigiit, taakku ilaatigut immitsinnut qanillivallaannginnissamik pingaaruteqarneranut tunngasumik assigiinngitsunik periusissaliornissaq akisussaaffigaat.

”Virusip tuniluussinnaanera annikillisarniarlugu kommunimi annertuumik suliniuteqarneq aallartinnikuuarput. Aamma ataatsimut isigalugu eqqiluisaarnerunissaq sulissutigalugu. Atuarfiit meeqqeriviillu tamarmik kiisalu Angerlarsimaffinni ikiortit eqqiluisaarnermi tamarmik immikkut periusissaqarput, meeqqat aamma eqqiluisaarnerunissamik ilinniartinneqartarput, pingaartumik errortortarnermi. Eqqiluisaarnermi periusissat sukannernerulersinneqarnerat, qanimut naapinnissamut taarsiullugu internet aqqutigalugu ataatsimiittarnerit allarpassuillu pineqarput. Iliuuserisassat annertuut sukumiisullu pineqarput, immitsinnullu qanillivallaannginnitsigut siaruaateriataarsinnaanermut pitsaaliuinermi pingaaruteqarluinnartuupput. Taamaammat aamma maani saqqarmioq atorparput, tassuuna innuttaasut sulisullu oqariartuummik eqqaasikkusullugit”, Carsten Jensen oqarpoq.

Najattaaq Jørgensen illoqarfinni nunaqarfinnilu angerlarsimaffimmi ikiortinut aamma utoqqarnut najugaqatigiiffinni aqutsisuuvoq, taanna oqarpoq angerlarsimaffimmi ikiortit maluginiarsimagaat saqqarmioq ataqqineqartartoq. ”Sulisugut assersuutigalugu utoqqarnik pisinniarfiliuussigaangamik saqqarmioqartarput, malunnartumillu inuit ataqqinnillutik qanillinaveersaartarput. Inuit angerlarsimaffimmi ikiortitsinnut qanillinaveersaarnissaat pingaarutilerujussuuvoq, taakkumi utoqqarnik tunillatsinnikkut aarlerinartumiissinnaasunik sullissisuupput”, Najattaaq Jørgensen oqarpoq.

Saqqarmiut tungujortut Kommuneqarfik Sermersuumi illoqarfinnut nunaqarfinnullu tamanut nassiunneqareerput, taamaalilluni kommunimi sulisut 1-2 meterinik qanillivallaannginnissamut oqariartuummik siammartereqataasinnaallutik.