E-sportimik pinnguarneq periarfissaalerpoq

Ukiaq manna Nuummi inuusuttut sunngiffimmi sammisinnaasaat ilaneqarput. Nuummi illoqarfiup immikkoortortaani Nuussuarmi, inuusuttut ornittagaani Inneruulami Kommuneqarfik Sermersooq qarasaasianik qulinik pilersitseqqammerpoq.

Ukiuni makkunani, qallunaatut taaneqartartoq E-sport, qarasaasiakkut pinnguarluni unamminerit nunarsuarmi nuannarineqaleraluttuinnartoq aamma nunatsinni malunnarpoq. Meeqqat inuusuttullu nuannarisaat malillugu Kommuneqarfik Sermersooq sunngiffimmi sammineqarsinnaanngorlugu neqeroorutigineqarpoq.

Misiliutaasumik pilersitsineq

Meeqqat inuusuttullu soqutigisaat assigiinngeqaat, taamaammallu susassaqartitsiniarneq Kommuneqarfik Sermersuumi Peqqinneq, Susassaqartitsineq Kulturimullu immikkoortortaaniit siammasissuunissaa pingaartinneqarpoq.

”Maluginianngitsoornikuunngilarput meeqqaniit inuusuttuaqqaniillu qarasaasiakkut pinnguarluni unamminerit nuannarineqaraluttuinnartut, taamaammat meeqqat inuusuttullu ornittagaanni Inneruulami misiliutaasumik pilersitsivugut,” taama oqarpoq Kommuneqarfik Sermersuumi Peqqinneq, Susassaqartitsineq Kulturimullu pisortaq Frederik Lundblad.

Kommuneqarfik Sermersuumi sumiiffinni allani assingusunik pilersitsinissaq suli aalajangiunneqanngilaq, taamaattorli,

”Una misiliutaavoq, tigulluarneqariarpat kiisalu misilittagaqarfigileriarutsigu takusinnaallugulu arlaatigut iluaqutitaqartoq, takorloorneqarsinnaavoq sumiiffinni allani assinganik pilersitsisinnaanissaq, tamannali politikkikkut aalajangigassaavoq,” Frederik Lundblad oqarpoq.

Qarasaasiamik pinnguarneq ataqatigiisitsisinnaavoq

Issiaannarluni pinnguarneq ilaanniit peqqinnanngitsutut isumaqarfigineqarsinnaavoq. E-sportimilli pinnguarneq suleqatigiiffiusarnera kiisalu pissusissamik malinaalluarfiusarnera inuusuttuaqqat ulluinnaannut iluaqutaasinnaavoq.

”E-sportimik pinnguarneq ilisinartigaa iligiiaarluni unammineq, taamaammat pinnguarnermi angusarissaarniaraanni pinnguartut ikioqatigiittariaqartarput pinnguarnermilu periusissat isumaqatigiissutigineqartariaqarlutik. Tassuunartaatigut inuusuttut suleqatigiissinnaanermik attaveqaqatigiissinnaanermillu siunissami inuiaqatigiinnut appakaallualerunik iluaqutigalugu ilinniarfigisinnaavaat,” Frederik Lundblad oqarpoq nangillunilu,

”E-sportimik ingerlataqarniaraanni pissusissamik malinnaalluarsinnaanissaq aamma pingaaruteqarpoq. Ullumikkut e-sportimik inuuniuteqartut ullortik pilersaarusiorluaqqissaarlugu ingerlasarput, assersuutigalugu qaqugukkut nerissanerlutik, qaqugukkut pinnguassanerlutik qaqugukkullu qasuersissanerlutik. Taamaammat e-sport suleqatigiinnissamut, ataqatigiinniissamut pissusissamillu malinnaalluarsinnaanermut ilinniarfiusinnaanera upperaara,” Frederik Lundblad naggasiivoq.

Qarasaasianik pilersitsinermi qarasaasialerinermik siunnersuisartut Modulo suleqatigineqarput.