Kommuneqarfik Sermersuup isumaginnikkut ikiorsiissutit aqussinnaavai

Ukioq manna kvartalit pingajuanni Kommuneqarfik Sermersooq aalajangiinernik 16-inik Isumaginninnermi Naammagittaalliuuteqartarfimmiit tigusaqarpoq. Suliani arfineq-pingasuni Kommuneqarfik Sermersooq ilalerneqarpoq, suliani marlunni innuttaasoq ilalerneqarluni suliallu arfinillit aallaqqaataaneerneqartussanngortinneqarlutik.

Innuttaasut 5.000-it sinneqalaartut Kommuneqarfik Sermersuumiit arlaatigut ikiorsiissutinik, utoqqalinersianiit inigisamut tapiissutinik, pissarsiaqarsimapput.

Innuttaasorlu isumaqaruni kommune malittarisassat malillugit iliorsimanngitsoq, taava Isumaginninnermi Naammagittaalliuteqartarfimmut suliamik tunniussisinnaavoq. Ukiumi kvartalit pingajuanni suliat 16-it aalajangiiffigineqarsimapput, taakkulu inernerivaat kommune suliani arfineq-pingasuni ilalerneqarneranik innuttaasullu marluk ilalerneqarnerinik. Sinneri aallaqqaataaniigassanngortinneqarput.

”Inuit aaqqissuussanik assigiinngitsunik suliaqartarmata soorunami aamma kukkusoqarsinnaasoqartuaannarpoq. Iluarisimaarluguli paasivara Isumaginninnermi Naammagittaalliuteqartarfiup suliani tiguneqarsimasuni amerlanerni malittarisassanik malinnittarsimanerput angusarsimammagu”, Ejner Grønvold, Suliffeqarnermut Isumaginninnermullu pisortaq, oqarpoq.


Pitsanngorsaajuarneq

Innuttaasut taama amerlatigisut pineqartillugit kukkusoqarneranik pisoqaratarsinnaajuassaaq. Taamatulli pisoqartillugu soorunami ajuusaarnartuuvoq, taamaattoqaraangallu tamatuma pitsaanerulersinnissaanut atorneqarnissaa pingaaruteqarpoq.

”Isumaginninnermi ikiorsiissutinik 5.000-it pisartagaqartillugit, taamatut amerlatigisunik kukkusoqarsinnaaneq periarfissaavoq, taamaattumik malitassat tamaasa malinneqarnissaat eqqumaffigiuartarparput. Naak Isumaginninnermi Naammagittaalliuteqartarfimmit suliani marlunni kukkusoqarsimanera  nassaarineqarsimagaluartoq, soorunami suliamik paasiniaalluni qulaajaanissamut periarfissaq atorluartarparput, taamatut ittunik kukkusoqaqqinnginniassammat”, Suliffeqarnermi Isumaginninnermilu Fagchefi Cecilie Victoria Schierbeck oqarpoq.