Innuttaasunut

Sermersooq: Nassuiaanneqarta

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nakkutilliisuutitanut tunniussineq isumaqarpoq kiisami inissiat pillugit suliap aallartinneqalerneranik, kisianni tunniussinermut tunngavigineqartoq Kommuneqarfik Sermersuumi borgmesterimit tupigusuutigineqarpoq.

Ataasinngornermi 26. oktobari sermitsiaq.ag allappoq Naalakkersuisut Kommuneqarfik Sermersuup Nakkutilliisuutitanut tunniunneqarnissaa pillugu aalajangiisimasoq. Tassa imaappoq, nittartakkakkut atuartartut suliaq pillugu Kommuneqarfik Sermersuutulli paasisimasaqartigisut.

”Namminersorlutik Oqartussat taamatut periuseqarnerat assorsuaq tupigusuutigivara. Suliap Nakkutilliisuutitanut nassiunneqarsimaneranik toqqaannartumik paasitinneqanngilagut. Aamma suliap sumut tunnganeranik paasitinneqanngilagut. Suna pillugu unnerluutigineqarnerluni paasissallugu inatsisitigut tunngaviulluinnarpoq, isumaqaraluarpungami tamatumani aamma tamanna kommunimi politikerinut atuuttoq”, Kommuneqarfik Sermersuumi borgmesteri Charlotte Ludvigsen oqarpoq.

Kommuneqarfik Sermersooq Namminersorlutik Oqartussani Nunamut Namminermut Immikkoortoqarfimmut nalunaarutiginninnerup assilineqarneranik piumasaqaraluarpoq, akineqaranili.

Namminersorlutik Oqartussani Nunamut Namminermut Immikkoortoqarfiup piffissami sivitsortumi Kommuneqarfik Sermersuup inissianik namminersortunit pigineqartunik innuttaasunut nalinginnaasunut attartortitsisarnera isorisimavaa. Taamaattorli Naalakkersuisut ataatsimiinnerannit imaqarniliami, Nakkutilliisuutitanut tunniussinissamik aalajangiisoqarnerani, suliami pappilissat piffissarititaasup iluani tunniunneqarsimannginnerat pineqartoq allassimavoq.

Taamatut tunngaveqarnerup ajornartorsiutitarivaa, ataatsimiinneq aamma aalajangiineq kommunip pappilissanik tunniussivissaa ulluni tallimanik sioqqullugu pisimanera, aamma pappilissat piffissaritinneqartup iluani tunniunneqarsimanerat.

”Naalakkersuisut kukkusumik suliamik qulequtsiisimanngikkunik, suliap sumut tunngavinnera isertorniarlugu, taava suliassamik ersarissumik tunngavissaqanngitsumik Nakkutilliisuutitanut tunniussaqarsimassapput. Taakku arlaannaalluunniit siunissami suleqatigiinnissamut pitsaasumik tunngavissiinngillat”, Charlotte Ludvigsen oqarpoq.

Kommuneqarfik Sermersooq arlaleriarluni Naalakkersuisunik ataatsimeeqatiserinnittarpoq, inissiat pillugit suliami aaqqiissuteqarusulluni, tamatigulli itigartinneqartarsimavoq, tamannalu mamiatsannartuuvoq.

”Naalakkersuisut inatsisinut nukippassuarnik atuinerat qatsuppara. Politikkimut iserpunga inuiaqatigiinni ajornartorsiutivut aaqqeeqataaffigerusukkakkit. Oqartussanut allanut sorsunniarlunga isinngilanga”, Charlotte Ludvigsen oqarpoq