Borgmesteri: Ineqarnermut tunngasut ajorluinnartut

Ineqarnermut suliap Nuummi pisortat inissiaataannik pissarsiniarnermut suliamik ukiorpassuarnik kinguarsaataasinnaavoq. 

Ullumi Sermitsiami atuarneqarsinnaavoq, soraarnerussutisianut aningaasaateqarfiit arlallit Qinngutsinni Iseritip inissiaanik 200-nik sanaartornissamut aningaasaliigallarniarnatik aalajangersimagaat. Tamatuma kingunereratarsinnaavaa inissiat amerlasoorpassuit sanaartorneqanngitsoorneranik.

Soraarnerussutisianut aningaasaateqarfiit marluk tunuarterniarlutik aalajangerpaat Naalakkersuisut Kommuneqarfik Sermersuumut nakkutilliinermut suliaqarnerat pissutigalugu, isumaat malillugu, ineqarnermut tunngasuni malittarisassanik nalornissuteqalersitsimmat. Tamanna Kommuneqarfik Sermersuup borgmesteriata Charlotte Ludvigsenip assut pakatsissutigaa.

”Nuummi inissialiornerup unitsinnissaa Naalakkersuisunit anguniarneqarsimappat oqaatigineqartariaqarpoq anguniagartik angugaat. Ukioq manna attartortitsinermut isumaqatigiissuteqanngilagut, tassungalu ilanngullugu iluanaarutigineqartutut ippoq Nuummi tamakkiisumik aningaasaliiffigineqartut inissiat 200-t suliap unitsissimasinnaagai. Eqqorneqartut tassatuaassapput Nuummi innuttaasut”, Charlotte Ludvigsen oqarpoq.

Kommuneqarfik Sermersuup, piginneqatigiiffini Iserit A/S aamma NCD A/S peqatigalugit, ukiorpassuarni pisortat inissiaataannik sanaartornissamut avataanit aningaasaliisussarsiorneq sulissutigaat. Suliniutit annertuut ilagaat Illoqarfiit Pingaarnersaat pillugu Periusissiap akuersissutigineqarnera, taanna tassaavoq piffissaq ungasinnerusoq eqqarsaatigalugu Nuup ineriartortinnissaanut pilersaarut, taamaaliornikkut aningaasaliissuteqartartut ineriartortitsinissamut toqqissisimasutut misiginiassammata.

”Kommunalbestyrelsip tamarmiusup siuarsaanissaq patajaatsumillu sinaakkutissatut atugassarititaasut pigineqarnissaat pillugu iliuuserisinnaasani tamaat iliuuseraa, aningaasaliissuteqarsinnaasut kajumissaarniarlugit. Taamatut sulineq iluatsileruttortut Naalakkersuisunit akorngusertippugut”, Kommuneqarfik Sermersuup borgmesteria oqarpoq.

Borgmesterip Naalakkersuisut Nuummi inissialiortoqarnissaanik kissaateqanngitsut ersarissumik takusinnaagaluarlugu, Naalakkersuisut suna kissaatigineraat nalornissutigaa.

”Naalakkersuisut maani Nunatsinni ataqatigiissumik najugaqariaatsimut tunngasumik periusissiornissaq sapersimavaat. Tamatumunnga tunngatillugu politikituaat tassaavoq Nuummi ineriartornermik, suliniutit akornusersorneratigut, kinguarsaanissaq”, Charlotte Ludvigsen oqarpoq.

Politikikkut isumaqatiginninniutiginagu ineqarnermut suliaq sivisuumik saqitsaassutinngortinneqarsimanera borgmesterimit ugguarineqarpoq.

”Ulloq taanna ineqarnermut suliap aallartinneraniit illuatungeriit akuerisinnaasaannik aaqqiissuteqarnissaq anguniarlugu oqaloqatigiinnissamut aggersaasarsimavugut. Tamanna Naalakkersuisut kissaatigisimanngilaat. Maanna politikiisa kingunerat takuneqarsinnaalerpoq”, Charlotte Ludvigsen erseqqissaavoq.